Yn pynkynmaw biang ka Sorkar MDA ïa u Amit Shah halor ka ILP bad ktien Khasi bad Garo

Shillong, Naiwieng 4 : Ka sorkar synrop lang Meghalaya Democratic Alliance (MDA) ka la rai ban pynkynmaw biang ïa u Myntri Kam Pohïing ka ri u Amit Shah ha ka jingwan jngoh jongu shen ïa ka nongbah Shillong halor ka Inner Line Permit (ILP) bad ka jingpynrung ïa ka Ktien Khasi bad Garo ha ka Khyrnit kaba Phra jongka Riti Synshar ka ri India.
U Symbud Myntri Rangbah u la ïathuh ba ka ophis jong u Myntri Kam Pohïing ka ri u Amit Shah ki la pyntip sha ka sorkar jylla ba u Amit Shah un sa wan jngoh ïa ka nongbah Shillong lah ban long ha kane ka taiew ban wan ne ha shwa ban kut une u bnai namar ki shu pyntip ba un wan tangba kim pat pynthikna ïa ka tarik.
“ Ka sorkar kan ïa kynduh beit ia u Amit Shah ban ïakren bad pynkynmaw biang ïa u halor kine ki mat kiba dang sahteng bad ka sorkar pdeng” ong u Symbud Myntri Rangbah.
Ha ka Sngi Palei u Symbud Myntri Rangbah u la ïa kynduh ïa ki san tylli ki seng bhalang ba kynthup iaka HYC, ENJC, JSM, HANM bad CORP ban ïakren halor ki mat ba sahteng kum ka ILP bad ka jingpynrung ïa ka ktien Khasi bad Garo ha ka Khyrnit kaba Phra. Nalor kata ki la ïakren ruh halor ka Meghalaya Resident Safety and Security Amendment Bill 2020 namar kane ruh ka dang sahteng bad ka sorkar pdeng kata bad ka tnad kam pohïing hi jong ka sorkar pdeng.
U la ïathuh ba u la kular ïa ki nongïalam kitei ki seng ba ka sorkar kan ïai bud dien biang bad ka sorkar pdeng ïakine ki mat ba sahteng kiba la mynjur da ka Resolution hapoh ka ïing Dorbar Thawaiñ ka jylla. “ Nga la ai jingmut ruh ïa ki ba ki seng bhalang ruh ki dei ban ïa kynduh ia u myntri kam pohïing ka ri bad dawa na u ba un pyntreikam noh ïakine ki mat ba sahteng ha kane ka jingwan jongu sha kane ka jylla” ong u bah Prestone.
Halor ka jingkren jong u Kiren Rijiju , myntri ka tnad Aiñ ka ri ba ka Meghalaya ka donkam bun ki MLA na ka BJP ba kin ïoh ïaki mat ba ki dawa kiba dang sahteng ha ka sorkar pdeng, u bah Prestone u la ong kane ka jingkren jong une u MP bad Myntri ka sorkar pdeng ka dei ka jingkren ‘Arsap”.
“Lada ka long shisha kumta nga ong ba ka dei ka jingkren bad leh arsap namar lada phi lah ban leh ïa ka hadien ka election balei ka eh ïa ka BJP ban leh mynta ruh. Lada phi lah ban leh bad phi aidaw ba phi dang bishar bniah ïa kine ki mat kumta ki dei ban leh ei ei bad pyntreikam ïakine ki mat ba sahteng mynta ym ban ïaleh politik da kine ki mat kiba ktah ïa ka jylla bad ka jaidbynriew” pynkut u Symbud Myntri Rangbah.