Balei ym pyllait shuh ïa ka Scholarship ki 10,000 ngut ki samla pule,jingkylli ka Trinamool Congress

Shillong, Naiwieng 04: Ka Trinamool Congress Student Union Meghalaya ha ka sngi Thohdieng ka la buh jingkylli ïa ka sorkar jylla halor ka jingpynslem jong ka ban pyllait ïa ka Scholarship jong ki 10,000 ngut ki samla pule kiba aplai ïa ka skhim Umbrella Scholarship Scheme wat hadien ba la kut ka shitaiew kumba u Myntri Rangbah ka jylla u la kular ha kine ki khyndiat sngi kiba la dep.
Haba kren sha ki lad pathai khubor u President ka Trinamool Congress Student Union u Samla Bansharailang Pyngrope u la ong ba kaba sngewsih ba ki khynnah pule khamtam kiba wan na ki longïing kiba duna ka ïoh ka kot kiba mut ban ïakhun ïa ka eksamin SSC ki hap leit bylla noh pynban ha jaka ban ïoh pynleit jingmut ban pynkhreh ïa kane ka eksain tang namar ba ka sorkar kam pyllait shuh ïa ka scholarship jong ki.
“Shitaiew tam mynshuwa u Myntri Rangbah ka jylla u la ong ba ka sorkar kan pyllait noh ïa ka scholarship tang hapoh shitaiew hynrei kat haduh mynta balei ka shitaiew jong u Myntri Rangbah kam kut shuh’ u la ong.
U la ong ruh ba kane ka jingleh mutlop ka sorkar ïa ki samla pule ka jylla ka pynduh mynsiem shibun eh ïa ki samla pule ka jylla namar wat hadien ba ka tip shai ïa ka jingkiewdor ki mar ki mata hynrei na ka liang jong ka kam pushe eiei ban ïarap ïa ki samla pule da kaba ka ai noh ïa ka scholarship ba dei hok jong kine ki 10,000 ngut ki samla pule.
U la ïathuh ruh ba ha ka jingshisha na ka liang jong ki kum ka seng ki don ka jingthmu ban mih surok ban dawa na ka sorkar ban pyllait noh ïa kane ka pisa hynrei namar ka jingpynjari noh ïa 144 CrPC ha nongbah Shillong ki la hap ban shu kyrpad rit ïa ka sorkar ba kan ym pynsyllang ïa ki samla pule vad ban ymlehkai ïa ka lawei jong ki hynrei ban pyllait noh wut wut ïa ka pisa sha ki.