Shillong, Naiwieng 4 : Ka Regional Committee na ka bynta ban pynbeit pud ha Ri Bhoi ba la khlieh da u Symbud Myntri Rangbah ka jylla u bah Prestone Tynsong ka la ïa kynduh ha kine ki khyndiat sngi bad ka la rai ba shen yn sa khot noh ïa ka jingïalang jong baroh ki Syiem, ki Sordar, ki Rangbah Shnong, KHADC bad ïa ki nongïalam na khappud bad ka Assam ban ïakren ïathir halor ka jingpynbeit pud bad ka Assam. U Symbud Myntri Rangbah uba dei u Chairman jong kane ka Committee u la ïathuh ba la rai ba ka jingbishar bniah ban pynbeit pud kan long shwa tang ïaka Block II bad ka Deshdommreah.
“ Ka daw ba ngi la rai ban bishar bniah shwa ïa kine ki ar tylli ki jaka namar ka long kaba eh ban shim baroh saw tylli ha ka juh ka por namar ym tip shuh katno sien yn ïa leit jurip bad hiar sha Block II bad Deshdoomreah ruh” ong u bah Prestone.
Haba la kylli hato ka sorkar ka buh thong ne em ban pyndep ïa kane ka kam shwa ka election MLA 2023, u la ong “ ïa kata ngam lah ban ong mynta bad dei tad hadien ka jingïakynduh jong ki ar tylli ki Regional Committee kata na Assam bad Meghalaya ba yn sa lah ban tip kumno ka jia ka long haba leit jurip sha khappud”
“ Kumba nga ong ba ka bol ka la sdang ban tyllun, kumta to ngin ïa ap bad peit hynrei ka jingthrang hi te ka long beit shwa ka election MLA. Hynrei ngam nud ban kular pat ïa mynta namar ïoh lehse ngi hap ban ïahiar lang 3 haduh 4 sien sha khappud , kumta ngam lah ong hynrei ka jingthrang hi te lada lah shwa ka election te kan long kaba sngewtynnad bad sngew kmen bha” ong biang u Symbud Myntri Rangbah.
Nalor kane u la ïathuh ba ka jingpynbeit pud na ka bynta ka Block I bad Block II ka kham pher namar kine kim dei ki jaka ba ïa kajia hynrei ki dei ki jaka ban ïakren ban pynphai noh sha ka jylla Meghalaya. “ Kane ka jingpynphai ruh kam mut baroh kawei ka Block I bad Block II hynrei tang ki shnong kiba dei jongka Meghalaya bad kata ruh hadien ba la leit jurip lang ïa kitei ki jaka da ka Assam bad Meghalaya. Ngi la dep ïakren lypa naduh ka jingïapynbeit pud kaba nyngkong bad u Myntri Rangbah ka Assam ba ha ka jingshisha ngi kwah ban ïoh lut ïa baroh ki jaka ba ïa kajia kynthup ïa ka Block I bad Block II ruh” ong u Symbud Mynri Rangbah.
Halor ka jingkylli na kaei ka daw ka Assam kam pat thung ïa ki Regional Committee u la ïathuh “ La pyntip ïa nga ba kin sa shu pynmih sa tang ka jingpynbna namar u Myntri Rangbah ka jylla u Conrad K Sangm bad u Myntri Rangbah ka Assam u Himanta Biswa Sarma ki la dep ïa kynduh biang dang shen bad ki la ïakren halor kane ka kam bad ki la ïarai lang ruh ba shen kin sa leit jurip lang ruh sha khappud.
Kat kum ki kyndon ki lai tylli ki Regional Committee jongka Meghalaya ki dei ban ïakren bad ia pynbeit bad ki Regional Committee jongka sorkar Assam halor ki kyrteng jong ki shnong ki thaw kiba la kam da ka jylla Meghalaya bad ban sdang ïa pynbeit noh ïa ka kam kat kum ba dei ban leh.
