Kular u Conrad ban ïakhun tyngeh ban ym ailad ïa ka jingpynmih bad khaïi rnga beaiñ

Shillong, Ïaiong 22 : U Myntri Rangbah ka sorkar jylla, Conrad K Sangma ha ka sngi Balang u la ong ba ka sorkar jylla ka tip ba ka don ka jingpynmih bad ka jingpynïaid iew beaiñ ïa u rnga ha ka jylla bad kumta ka la shimkhia ban khanglad ïa kane.
Ïa kane u Myntri Rangbah u la kren haba jubab halor ka call attention notice ba la wanrah da u MLA ka Nongpoh, Bah Mayralborn Syiemlieh ba ka tnad Forest kam lah satia ban tehlakam ïa ka jingkhaïi beaiñ ïa u rnga ha ka jylla.
Shuh shuh u Myntri Rangbah u la pyntip ruh ba ki la don bun bha ki lad jingïada ba la shim da ka tnad ban tehlakam ïa ka jingkhaïi beaiñ ïa u rnga da kaba thaw ïa ki kynhun khynra da ki nongtrei ka tnad Forest ban lap ïa ki nongkhaïi beaiñ ïa u rnga, pynshitom ïa kiba pynkheiñ ain ha ïingbishar, bad kurup ïa u rnga ba khaïi beain lane lum thup beaiñ.
Shuh shuh u ong ruh ba wat ha ki karkhana Ferro Alloy kiba pyndonkam da u rnga, la ju leit jurip man ka por ïoh don kiba pynlang ne pyndonkam beaiñ ïa u rnga ha ki karkhana jong ki.
Ha Ri Bhoi bad ha West Khasi Hills District, tang ha kine ki san snem, ki la don haduh 23 tylli ki jingjia kiba la dep ban ujor sha Ïingbishar halor ka jingkhaïi beaiñ ïa u rnga, pynmih lane pynlang ïa u rnga.
Tang ha West Khasi Hills, ki la don haduh 13 tylli kiba la dep ban ujor ha u 2022 na ka bynta ka jingpynmih beain ïa u rnga.
Nalorkine, ar tylli ki jingjia la dep ban pyndep ha Ri Bhoi District.
Shuh shuh la ong ba la don haduh 95 ton u rnga ba la dep ban kurup ha kine ki san snem bad 2,60,000 tyngka kaba shah dain kuna.
Dang shen, u DFO Nongstoin u la pyrshang ban tehlakam ïa ka jingpynmih bad khaïi beain ïa u rnga da kaba kyrpad ïa u District Magistrate ban pynjari da ka 144CrPC ha West Khasi Hills. Nalorkata, ka West Khasi Hills Forest Division ka la pynlong ruh ka jingpynsngewthuh paidbah ha ki shnong ki thaw nalor ki social media halor ka jingdonkam ban pynneh pynsah ïa ki khlaw ki btap.
U Myntri Rangbah u la ong ruh ba ka jingpeit ïa ki khlaw lait noh ïa ki khlaw jong ka sorkar, kiwei pat ki hap ha ka jingpeit jong ki District Council.
“Kumta ha kito ki khlaw bah, kiba hap ha ki riewshimet ne jong ka shnong, ki hap ha ka jingpeit jong ka District Council kiba la khmih lynti ba kin noh synñiang lang ban tehlakam ha ka jingpynmih beaiñ bad pynïaid iew beain ïa u rnga,” u la ong. Nalorkata, u la ong ruh ba ym pat ju don satia ka jingpynmih rnga beain na ki khlaw ba la sumar kyrpang kiba odn ha Ri Bhoi bad ruh ha West Khasi Hills.
Shuh shuh u la ba ka jingïakren kadei hi halor ka jingujor jong kawei ka sengbhalang, ka Meghalaya Clean and Green Organisation sha u Chief Forest Officer, Khasi Hills Autonomous District Council pyrshah ïa ka jingkhaïi beain ïa u rnga.
“Kumta baroh lai liang donkam ban ïa treilang kum ka kynhun met bad mynsiem hapoh ka bor jong ki ban ïakhun ïa kane ka jingpynmih bad ka jingkhaïi beaiñ ïa u rnga,” u la ong.
U ong ruh ba ka tnad Forest kan kham peitngor ruh halor katei ka bynta bad bteng ban jurip ïa ki kali kiba ïaid lyngba ki checkgate ban lap ïa ki kali kit rnga beain bad ruh ban shim ïa ki sienjam katkum ki kyndon ka aiñ.