Shillong, Lber 22 :U MLA ka seng Congress na Umsning Constituency u Dr Celestine Lyngdoh ula ong, ban kam ba ki surok ki dei u budlum jong ka roi ka par kam long kaba ïahap ha ka jylla Meghalaya namar ka jingsniew ki surok ka dei ka daw bah ba ki paidbah kin kdiah ki shyieng ki shruh ne ba thut ka roi ka par.
U Dr. Lyngdoh uba don ha ka Liang Pyrshah ula kren ïa katei haba buh ïa ka jingkylli mynta ka sngi hapoh ïing Dorbar Thawaiñ ka jylla.
Haba jubab ïa kane, u Symbud Myntri Rangbah ka jylla uba khmih ruh ïa ka tnad PWD (Roads) u Bah Prestone Tynsong ula ong, ka jingshah ban kit ïa kino kino ki jingkit ka long katkum ki kyndon jingbthah kiba la buh da ka Indian Roads Congress (IRC) naduh ki surok National Highway haduh ki surok district bad shnong.
Ula ong, ka jingkit ka long naduh 12 Ton haduh 18 Ton hynrei ki don pat ki khep ba ki trok ki kit haduh 35-40 Ton ruh.
U Bah Tynsong ula pyntip ba ka techical specification na ka bynta ka jingrben jong ki surok PWD kadei kaba la bud ryntih ïa ki kyndon jongka IRC.
Ula kdew ruh ba ka don ka jingïapher ha ka jylla Meghalaya bad ka Rajasthan. “Kam dei ka kamram jongka jylla ban dawa ban shna rben ïa ki surok hapoh ka jylla” ong u Bah Prestone.
Ula pynshai ruh, ba ka IRC ka la dep ban pynlong ïa ka jingwad bniah ha man la ki jylla ym tang ha Rajasthan hashwa ban pynmih ïa ka Manual (ha kaba ïadei bad ka jingrben jongki surok).
Ha kaba ïadei bad ka jingmaramot ïa ki surok kiba sniew, u Bah Tynsong ula ong, ka sorkar ka la shim ïa ki lad ki lynti da kaba pynrung ïa ki kyndon ba dei ban don ïa ka “Warranty” ïa ki surok kiba dei ki projek kiba la bei tyngka da ka sorkar jylla.
Ula pyntip ba ka jingshna ïa ki surok ha nongkyndong lyngba ka Pradhan Mantri Gram Sevak Yojana (PMGSY) ruh la bud ryntih ïa ki kyndon jingbthah jongka Rural Roads Manual, 2002 (SP-20) jongka IRC.
Ha kaba ïadei bad ka annaul maintenance contract (AMC) jongki surok PMGSY na ka bynta 5 snem hadien ba la dep ban shna ïa ki, u Bah Tynsong ula ong, ki kyndon jong ka jingmaramot ïa ki surok ka dei na ka bynta kito ki skhim kiba la mang lyngba ka RIDF XXVI bad ki don ruh katto katne ki skhim kiba la mang lyngba ka systematic maintenance programme (SMP).
Na ka liang jong u MLA ka UDP na Mookaiaw u Bah Nujorki Sungoh ula kyrpad ïa ka sorkar ban khmih lem ïa ki 3 tylli ki surok PMGSY kiba don ha ka constituency jongu kiba la sniew bha bad na ka liang u Symbud Myntri Rangbah ula pynthikna ban shimkhia ïa katei ka jingpynsngew.
