Ïoh khusnam Padma Shri u Risingbor Kurkalang kum u nongsaiñdur ïa ki tiar tem tynrai

New Delhi, Lber, 22: Ka President jong ka ri India, ka Droupadi Murmu ha ka sngi Balang ka la pynkup burom da ka khusnam Padma Shri ïa u Bah Risingbor Kurkalang u nongshong shnong jong kane ka Jylla Meghalaya ha ka Civil Investiture Ceremony kaba la long ha New Delhi.
U Bah Risingbor Kurkalang u la ïoh pdiang ïa khusnam Padma Shri kum u nongsaiñdur ba pawnam uba la shna ïa ki tiar put tiar tem tynrai bad u dei ruh u nongtem nongput uba tbit.
La kha ïa u ha ka 19 tarik, Naiwieng, 1970 ha ka longiing jong ki nongrep ha ka shnong Laitkyrhong, East Khasi Hills. U
dei uba ju sngewtynnad ïa ka put ka tem kaba u la ïoh mynsiem na u Paieid jong u. U la sdang ban shna ïa ki tiar put tiar tem tynrai bapher bapher bad u la pyntbit bha ïalade ban tem ïa kine. U la sdang ban shna ïa ki tiar put tiar tem ban pynïaid iew ha u snem 2001 bad u dei uba nyngkong na ka shnong jong u ban shna ïa kine ki tiar.
Kawei ka kynhun nongtem tynrai ka la wer ïa u Bah Risingbor ha u snem 1990 ban leit tem ha All India Radio bad Doordarshan Kendra na ka bynta ban rekod ïa ki jingrwai hapoh ki prokram jong kine ki ar tylli ki rynsan pathai khubor kiba long kyrpang na ka bynta ki sur jingrwai tynrai. Kane ka la ïarap bha ïa u Risingbor ha ka kam jong u kum u nongput nongtem bad u nongshna tiar tem.
U la shang sha ki bynta bapher bapher jong ka jylla bad ha ka ri India ban pyni ïa la ka sap kum u nongput nongtem bad u nongshna tiar tem bad kum u nongpynneh ïa ka sur jingrwai tynrai bad ki rukom shad tynrai jong ki Khasi. Ki tiar tem jong u Bah Risingbor ki dei kiba u la shna hi da ki kti bad lyngba ka jingshemphang halor ka jingbha bad ka rukom saiñdur.
U la ïashim bynta ha ki prokram bad ki jingïathir nia bapher bapher kiba kynthup ïa ka jingïatai halor ki sur jingrwai tynrai/ ka jingshna ïa ki tiar tem tynrai ba la pynlong da ka Sorkar Meghalaya. U la ïashim bynta ruh ha ka Vadya Darshan ba la pynlong da ka Sangeet Natak Akademi, New Delhi ha u snem 2002 bad u la ïashim bynta ruh ha ka bynta kaba ar jong ka Thoh Shun International Art Camp 2006 kaba la long ha Sohra, East Khasi Hills District.
U la ai ïa ki sur jingrwai ha ka International Festival on Inter- Cultural Dialogue hapdeng ka thaiñ phang shatei jong ka ri bad South East Asia ha u snem 2010.
U la thoh bad ai ïa ka jingrwai kaba u la jer kyrteng ‘Mei Mariang’ na ka thup jingrwai ‘Sai-thaiñ ki Sur’ da ka Khasi-Cymru kaba la pyllait paidbah ha u 2021 ha Naxos World. La khot sngewbha ïa u da u Gareth Bonello uba dei u nongput nongtem na ka ri Wales, United Kingdom ban put ban tem lang bad u ha ka Rajasthan International Folk Festival (RIFF) ha Jodhpur (2022).
U la ïoh ïa ka Certificate of Appreciation na ka bynta ka jingïashim bynta jong u ha ka jingïathir nia halor ka jingshna ïa ki tiar tem tynrai kaba la pynlong da ka Sorkar Meghalaya ha u snem 2008.
U la ïoh ruh ïa ka khusnam Martand Singh Memorial Award 2021 jong ka INTACH, ka song tyngka ha ka thup Handicraft Category kaba T.1 lak na ka Indian National Trust for Art and Cultural Heritage (INTACH), New Delhi.