Kular u Bah Paul lyngba u CM ban kren ïa ka Sorkar India ïa ki jingdawa ki samla pule NEHU

Shillong, Naiwieng, 19: U Myntri ka Sorkar Jylla u Bah Paul Lyngdoh ha ka sngi Baar u la leit jngoh da lade hi ïa ki samla pule jong ka skulbah North Eastern Hill University (NEHU) kiba pynlong ïa ka jingïakhih shah thngan kaba khlem pud sngi ban dawa hiar shuki ïa u Vice Chancellor u Prof. PS Shukla.
U Bah Paul Lyngdoh ha ka jingïakren bad ki lad pathai khubor u la ong, “kum u samla pule barim jong kane ka skulbah ka long shisha kaba sngewdiaw ban ïoh ïa ka jinghiar arsut jong kane ka skulbah. Ha ka por ba ngi dang pule ha kane ka skulbah, ngi don kawei na ki 50 tylli ki skulbah kiba hakhmat eh jong ka ri India bad mynta ka la poi sha ka kyrdan kaba 128 kaba pyni ba ka don ka nia bad ka don ka nongrim ha ka jingïakhih jong ki samla pule.”
“Ka jingsynshar bad ka jingleh donbor jong u Vice Chancellor uba dang don hapdeng ka shuti kaba 15 sngi, ngi ïohi shai ïa ki dak ki shin ba ka don ka jingduna ha kiba bun ki liang, ka jingduna ki nongtrei, ki nonghikai, ka jinghiar ha ka rukom ai jinghikai, ka jingthung ïa ki nonghikai ki bym pat biang ka kyrdan pule bad kumta ter ter,” la ong u Bah Paul.
“Nga kwah ban pynthikna ba kine ki jingsngewkhia kin ym sahkut tang ha ka Campus jong ka skulbah bad ba ka jingshong shah thngan jong kine ki samla pule kan long kaba sepei,” u la bynrap.
“Na kata ka daw, nga kwah ban pynthikna ba ka Internal Report ba kine ki samla pule ki la sdang ban lum ban lang ki la pyntip ba kin sa ai kopi ïa nga tang shu dep hapoh shi sngi ar sngi bad ngan ïa kata ngan sa rah sha u Myntri Rangbah ka Jylla bad lyngba jong u yn sa phah sha ka Ministry of Education,” la ïathuh u Bah Paul.
U la ong ruh ba ki dkhot jong ka Enquiry Committee ba la thaw da ka Ministry of Education la kumno kumno ki dei ban wan jngoh khnang ban lap ïa ki jingshisha.
Haba kylli, u la ong, “nga wan ym eh tang kum u Myntri ka Sorkar Jylla hynrei kum u samla uba la pule teng ha kane ka skulbah. Kane ka dei ka skulbah ba la pynïaid da ka Sorkar Pdeng bad ngi khmihlynti ba katkum ka bor ba la pynkhamti ha ka skulbah da ka Aiñ ba la mynjur da ka Parliament ka dei ban lah ban pynbeit ïa kine ki kynrum kynram.”
U la pynpaw ruh ba kam dei ka kamram jong ka Sorkar Jylla hynrei haba u don u Vice Chancellor ba pura ka dei ka kamram jong u bad ka dei ka itkiar jong u ban pynbeit ïa kino kino ki kynrum kynram. “Manba mih ki kynrum kynram, ha kane ka skubah ka Sorkar Jylla kan dei beit ban tuklar, ngin ym ïoh shuh ïa ki nongpynïaid kiba tbit bad lada mih kino kino ki jingeh kin phai khmat beit sha ka Sorkar Jylla ban leh la ka jong ka bynta. Hynrei ngi lah ban tuklar lehse tang lada ka mih ka huri hura,” u la ong.
“Hynrei lada phi pule ïa ka aiñ jong kane ka skulbah ba la thaw da ka Parliament, ka bor baroh ka don ha ka Ministry of Education bad ha u Vice Chancellor uba ïalam ïa kane ka skulbah,” u la bynrap.
U la ïathuh ba ka NEHUSU kan hap ban shong ïa ka jingïalang ban shim ïa ka rai la kan dang bteng ne sangeh noh ïa ka jingïakhih.
“Nga kham sngewkhia ym tang ïa ka jingkoit jingkhiah jong ki samla pule hynrei wat ïa ka jingkoit jingkhiah jong kane ka skulbah namarba ka dei ka skulbah ba la pynïaid da ka Sorkar Pdeng kaba la sei shibun ki khlur ha ka imlang ka sahlang,” u la ong shuh shuh.
U la ïathuh ruh ba ka Deparment of English kaba u la pule ha ki snem ba mynshwa, ka dei kawei na ki Top 10 ha ka ri India. “Hynrei mynta ka poi shano? Namarba ka kyrdan ka la hiar arsut ban ïa ka nombar shi spah,” u la kynthoh.
Shuh shuh u la kynthoh ba ka jingmih kine ki kynrum ki kynram ka dei ka jingbym lah, ka jingbym don jingkitkhlieh, ka jingphiel bad ka jingbym lah jong u Vice Chancellor ban pynshisha ïa lade kum u nongïalam.