Kular ka TMC ban pyndam ïa ka MoU ïa pynbeit pud hapoh 100 sngi lada ïoh synshar ha Meghalaya

Shillong, K’lyngkot, 24: Ka All India Trinamool Congress (AITC) ha ka sngi Baar ka la pynbna paidbah ïa ki 10 tylli ki mat jingkular ba kynthup ruh ban pyndam mardor ïa ka Dulir Ïasngewthuh Jingmut (Memorandum of understanding) ba ladep ïasoi da ka Sorkar Meghalaya bad ka Sorkar Assam ban ïapynbeit ïa ki hynriew tylli ki jaka ba ïakajia pud, hapoh 100 sngi lada ïoh bat ïa u lakam synshar ha ka jylla Meghalaya.
Ïa ka Election Manifesto la pyllait paidbah da u National General Secretary ka AITC u Abhishek Banerjee ha ka jingïalang kaba la long ha Pinewood Hotel ha kaba la sakhi lang da u State President u Bah Charles Pyngrope, u Nongïalam ka TMC Legislature Party u Mukul Sangma, u Vice President u Bah George Lyngdoh, u Nongïalam ka AITC Parliamentary Party ha Rajya Sabha u Derek O’Brien, u nongpeit ïa ka Jylla Meghalaya u Manas Bhunia bad kiwei kiwei.
Ka AITC ka la kular ban ai kham bun ki lad ki kabu bad ban kyntiew ïa ka khih ka kamai, ka lawei ba phyrnai, ban pynkupbor ïa ki kynthei, ban ai jingshngaiñ ïa ka imlang ka sahlang, ban pynkmen ïa ki nongrep, ban pynjanai ïa ka koit ka khiah, ban pynbha ïa ka pule ka puthi bad ban burom ïa ki dorbar trai ri bad ïa ki jaka ba kyntang.
“Ngin pynthikna ba manla kawei pa kawei ka jingkular yn sa pyntreikam hapoh 100 sngi naduh ba la thaw ïa ka Sorkar. Kane ka kular jong nga sha manla iwei pa iwei……,” ong u Abhishek haba kren ha kane ka jingïalang.
“Ngi ju ïohsngew ïa ka Sorkar ar enjin hynrei ka party jong ngi ka dei ka party kaba pyndep ïa kaba la kular. Ïa ki jingkular kiba ka TMC ka la khlei shwa ka elekshon ha Bengal la lah ban pynurlong hapoh lai bnai.”
Haba kynthoh ïa ka NPP kaba bat ïa u lakam synshar bad ki seng saiñpyrthei kiba ïasynrop lang ha ka Sorkar MDA ki bym pat lah satia ban pynmih pyrthei ïa ki Manifesto, u Abhishek u la ong, “dei tang ka TMC ha Meghalaya khamtam ha ka jylli jong ka saiñpyrthei ha ka jylla kaba la lah ban sei madan ïa ka Manifesto tang hadien ba ladep pynbna ïa ka elekshon hynrei kaba sngewsih ka long ba ka party bad ki briew kiba khot ïa ngi kum ki nongwei haduh mynta kim pat lah satia wat tang ban pynmih pyrthei ïa ka Manifesto bad ïa ka Vision Document namarba kim don ka jingïohi jngai ïa ka Meghalaya, lymne kim don thong na ka bynta ka jylla Meghalaya.”
“Ha ki san snem baladep, ka Sorkar kaba la synshar ïa ka jylla bad kaba la put turoi shaphang ïa ka sorkar ar enjin hynrei ka dei ka Sorkar kaba tlot tam, ka bym kotbor, bym lah ban leh eiei ha ka ri kumba ladep ïohi,” u la ong.
Da kaba pynpaw ba ka party jong u kan bat la ka kular ban burom ïa ki dorbar trai ri bad ïa ki jaka ba kyntang, u Abhishek ula ong, “ïa ka MoU ba ladep ïasoi bad ka Sorkar Assam yn sa pyndam, yn sa buh ruh ïa ki Police Check-posts ban pynkhlaiñ ka jingpahara ha khappud.”
“Kane kan sa weng ïa ki jingeh ba ïadei bad ka jingaiti ïa ka khyndew sha ka Assam bad ban ïada ïa ki nongshong shnong ha ki shnong khappud. Ïa ka jingïasyllok ba thymmai yn sa pynsdang biang ban wad ïa ki lad ki lynti kumno ban weng ïa ki jingeh ha khappud,” u la bynrap.
U la ong ba ka party kan sa pynthikna ruh ban pyntreikam mardor ïa ka Meghalaya Residents Safety and Security Act (MRSSA), 2016 ha baroh kawei ka jylla ban pynthikna baroh ki nongbylla kiba nabar ki dei ban da pynrung kyrteng ïalade.
“Ngin sa wanrah ruh ïa ka Private Member Bill ha Parliament na ka bynta ban pynïoh ïa ka jingithuh ïa ka Ktien Khasi bad Garo ba kin ïohrung ha ka Khyrnit Baphra jong ka Riti Synshar,” u la ong bad bynrap ba ka party kan sa wanrah ruh ïa ka Village Administration Bill da kaba ïasyllok lang bad ki Autonomous District Council (ADC) bad ïa ki khlieh nongsynshar shnong ban ïada ïa ki dorbar trai ri.
Da kaba kular ban kyntiew ïa ka khih ka kamai, ka AITC ka la ong ba kan pynthikna ba ka ïoh ka kot ha ka jylla kan kiew artet ha ki san snem sa wan ban pynkiew arshah ïa ka GDP bad ban pyntikna ban pyllait ïa ka jylla Meghalaya na ka jingduk jingkyrduh.
Nalor kata, ka TMC ka la kular ban pynkiew 4,000 hajar tylli ki MSME ha ka shi snem ka ban long saw shah na kaba mynta ha kaba yn pynkiew ïa ka jingdon jong ki MSME ba treikam ha ka 1.3 lak unit ha ki san snem ban sa wan.
Ha ka Manifesto, ka TMC ka la kular ba ka jingtih marpohkhyndew yn sa ailad biang da kaba bud pyrkhing katkum ka rukom stad saïañ bad ka Mining Policy khnang ba ym pynïap thngan ïa ki longïing bad bynrap ruh ba ka Policy kan long katkum ki kyndon jong ka aiñ.
Da kaba kular ban wanrah ïa ka lawei ba phyrnai sha ki paidbah ka Jylla, ka party ka la kular ban aikam palat 3 lak ha ki san snem ban sa wan bad ban ai jingsiew T.1000 hajar shi bnai (12 hajar shi snem) sha uwei pa uwei u samla bym pat ïohkam hapdeng ka rta kaba 21 snem-40 snem hapoh ka Meghalaya Youth Empowerment (MYE) Scheme.
“1 lak tylli ki laptop yn sa ai sha ki khynnah skul kiba pule ha ki Higher Secondary bad ïa ki samla pule College ha ka jylla khnang ban pyntyllun shakhmat ïa ka Digital Education. Baroh ki briew kiba shahniah ha ki kam jngohkai pyrthei bad ïa ki jingshakri jong ki yn sa ai jingïarap lyngba ka Job Card ba la pynrung kyrteng bad ka Sorkar ha kaba yn siew Honorarium manla u bnai T. 2,500,” la kular ka TMC ha ka Manifesto.
Ka Manifesto ka la ong ba ka party kan ai ïa ka Direct Transfer kaba T. 1,000 shi bnai (T. 12,000 shi snem) sha ki kynthei ha manla kawei pa kawei ka longiing kum ka jingpyntreikam bad jingkyrshan hapoh ka Meghalaya Financial Inclusion for Women Empowerment (MFI WE) Scheme khnang ban pynkup bor ïa ki kynthei ha ka jylla.
Haba kylli, naei ka pisa kan wan ban pyntreikam ïa kine ki skhim, u Abhishek u la ong, “ka jylla ka don ïa ka pisa hynrei ka Sorkar kam don jingmut ban pynlut. Kane ka dei ka jingïapher kaba ngi kwah ban wanrah bad kaba ngi kwah ban thaw.”
“Kam dei ka jingai sngewbha ba ka Sorkar ka ai ïa phi, ka dei ka hok jong phi bad ngi wan hangne ban ïakhun na ka bynta ki hok jong phi ban pynthikna ba phin ïoh ïa kaba phi dei hok. Lada kawei pa kawei ka kynthei ha manla kawei ka longiing ka ïoh jingïarap pisa T. 1000 hajar bad T.12, 000 hajar shi snem ka jinglut jong ka pla tyngka kan long T.750 klur bad kata kan long 3% na ka mang tyngka,” u la bynrap.
Shuh shuh, ka party ka la kular ban ai jingshngaiñ ïa baroh ki nongshong shnong kaba siew ïa ka Social Welfare Pension kaba T. 1,000 shi bnai (T. 12,000 shi snem), ban pynkiew ar shah ïa ka jingkyrshan pisa ïa kiba duna dkhotmet, ïa ki kynthei kiba kit khunrei, ïa ki thei ïap tnga bad ïa ki riewtymmen.
Ka Society Security Scheme, ka Meghalaya UNITE (Meghalaya Unorganized Sector Training and Empowerment scheme) na ka bynta ki 2.8 lak ngut ki nongtrei ha ki shlem treikam bym pat ïoh jingithuh da kaba ai jinghikai, pynïoh jingsumar ei, ka Life Insurance bad ban siew ïa ka Provident Fund.
25% yn pynkiew ïa ki jingsiew na ka bynta ka koit ka khiah, ka jingïarap ha ka pule puthi, haba ïap, haba ïathoh shongkurim bad ka jingsiew baibam sha ki briew ba duna dkhotmet hapoh ka Meghalaya Building and Construction Workers’ Welfare Board.
Yn pyntreikam ïa ka E-ration cards na ka bynta baroh bad ban sorjamin biang ha baroh ki distrik ïa ka jingdon jong ki nongïohbhah ba kin ïoh ïa ki marbam reshon bad bynrap ruh ba baroh ki marbam reshon yn sa pynkiew na ka 4 sha ka 8 (u phan, shana, ka umphniang shet jynshet bad ka mluh ruh yn sa kynthup lang).
Ka party ka la kular ruh ba pynsdang ïa ka Farmers’ Assistance for Rural Meghalaya (FARM) Scheme ha kaba yn sa ai jingkyrshan pisa kaba T. 10,000 ha ka shisnem sha baroh ki nongrep ha ka jylla.
Ka party kan sa buh ruh ïa ki FARM Centres ha baroh ki distrik ka jylla bad ka jaka ban ïarap ïa ki nongrep ban pynïaid iew ïa ki mar rep nalor kaba pyntreikam ïa ka FARM Crop Insurance Policy kaba kynthup lut ïa baroh ki mar rep khnang ba ki nongrep kin ym duhnong.
Halor ka koit ka khiah, ka party ka la kular ban ai ïa ka Maternal and Child Care Centres ha baroh ki Block khnang ban pynthikna ban ai jingsumar ïa ki khunlung shwa ban kha bad ynda ladep kha bad ban pyntreikam shi spah na ka shi spah ïa ki PHC bad ki CHC ha ka jylla.
Da kaba pynpaw ba donkam ban pun jingkieng ïa ka jingduna ki Specialists, ki nongtrei bad ki tiar, ka AITC ka la kular ban wanrah ïa ki Medical College ba thymmei bad ban pynïoh ïa ka koit ka khiah kaba paka ha baroh kawei ka jylla. Ka AITC ka la kular ban kyntiew 25% ha ka koit ka khiah na ka bynta ki riewtymmen hapoh ka Meghalaya Health Insurance Scheme (MHIS), 60 ki dukan die dawai, kawei na manla kawei ka block ha kaba yn sa ai jingkyrshan kaba 20% ka subsidy.
Khnang ban pynïoh ïa ka pule puthi kaba bha sha baroh ki khynnah, ka AITC ka la kular ban pyntreikam ïa ka Direct Benefit Transfers kaba T.1,200 ha ka shisnem sha baroh ki longing jong ki khynnah skul kiba pule ha ki skul sorkar ka ban kynthup ruh ha ka bai kot bad ki tiar jinghikai.
Ka AITC ka la ong ba kawei pa kawei ka block kan don ïa ka Model School, ka jingshna pynbha ïa ki skul ha baroh ki district bad ban kyntiew ar shah ïa ka kam hikai skul ha ka jylla.
Ka la kular ruh ban pynïoh ïa ka umbam umdih sha baroh ki thliew iing, ban pynthymmai biang ïa ka MeECL khnang ba ki paidbah kin ym shah pynthud ha ka jingïoh bording.
“Baroh 6,459 tylli ki shnong ha Meghalaya yn sa pynïasoh da ki surok rong ïaid kali bad ban shna pynbha ïa baroh ki surok,” ong ka Manifesto bad bynrap ba ka Shillong Ring Road Project (kaba pynïasoh ïa ka Eastern bad Western Bypass) yn sa pyndep khnang ban weng ïa ka jingdheng kali ha nongbah Shillong.
Nalor kata, ka AITC ka la kular ban wanrah ïa ka Sports University ba nyngkong eh ha ka jylla bad ban buh pisa T. 10 klur na ka bynta ban kyrshan ïa ki 22 tylli ki State Sports Associations ba la pynrung kyrteng bad ïa baroh ki sports club ba la ïoh jingithuh hapoh jong ki.
Kan pyntreikam ruh ïa ka Mission Sports ban ithuh, ban hikai bad ban kyntiew ïa ka sap ka phong ha baroh ki block level. Manla ki distrik yn sa buh ïa ka State-of-the-art Multi-purpose Stadium.
Ka Manifesto ka la ong ba ka party kan sa tei ïa ka Meghalaya Music Promotion Board ban kyntiew ïa ki nongrwai ka jylla lyngba ka jinghikai bad ka jingïarap da ka thong ban rah ïa ki nongrwai sha ka kyrdan bad ki ri ka pyrthei.
“Yn sa tei ruh ïa ka Cultural Tourism Circuit da kaba ithuh bad kyntiew ïa ka kolshor bad ki jaka ba paw ha ki district. Yn sa ai jingïarap bym don kam siew sut haduh T. 2 lak sha ki shnong ki thaw ban buh ïa ki Homestays bad ban ai jinghikai ha ki kam jngohkai pyrthei,” la bynrap.
Ka party ka la kren shai ba kan ym ailad ïa ka bamsap ha ka jylla hynrei kan thaw da ka vigilance committee bad ban tohkit manla ka por ïa ki tnat treikam ka sorkar.
Ka AITC ka la kular ban pyndam ïa ka Meghalaya Regulation of Gaming Act, 2021 lyngba ka aiñ, da kaba burom ïa ka jingsngew jong ki paidbah.