Hiar ka HANM ha Borsora ban pynsangeh ïa ka jingshalan dewïong sha Bangladesh

0

Shillong, Kyllalyngkot 24 : Ka HANM Seng Kmie ha ka sngi Nyngkong ka la hiar sha Borsora ban pynsangeh ka jingshalan dewïong sha Bangladesh hadien ba ka seng ka la ïoh jingtip ba ka jingshalan dewïong sha Bangladesh la kit ïa u dewïong uha dei napoh ka jylla ym u dewïong ba wan kit na shabar ka Jylla.
Katkum ka hukum jong ka sorkar lyngba ka tnad Mining and Geology ba la pynmih ha ka 12 tarik Kyllalyngkot 2023 la shah ban shalan biang ïa u dewïong sha Bangladesh uba dei na shabar ka jylla ym ban kit ïa u dewïong uba dei napoh la ka jong ka jylla lyngba ka e-way bill. Ka seng ka la ïoh jingtip ruh ba ïa kane ka jingshalan dewïong la leh da uwei u bar jylla ha ka kyrteng jong ka Ruthina D Marak na East Garo Hills District ha kaba ki trai dewïong ki hap ban ïoh ka challan lyngba jong u ym ka challan na ka sorkar jylla.
U Bah Willson Sohshang uba dei u assistant general secretary ka HANM Seng Kmie haba ïakren bad ki nongthoh khubor u la ong ba ka Seng ka dap da ka jingsngewkhia ba ïa kane ka kam la leh trai khlieh da u bar jylla kaba la pynduh nong shibun ïa ka ïoh ka kot jong ka jylla. U la ong ruh ba ka seng ka la ïoh ïa ka NoC ba ka DC jong ka SWKH ka la shah ban shalan biang ïa u dewiong da kaba kdew ba uba dei na shabar jong ka jylla hynrei ka seng kam lah ban pdiang namar ïa u dewiong la shalan sha Bangladesh da u dewïong uba dei napoh la ka jong ka jylla.
U Bah Lamphrang Kharbani President ka seng HANM u la ong ba ka seng kam map satia la kidei kita ki High level, low level lane ki middle level lada ki thmu ban bamduh ïa ka ïoh ka kot lyngba ki marpoh khyndew bad kiwei kiwei ki jingmyntoi kiba mih napoh ka jylla. KA seng ka la ïakynduh ruh ïa u superintendent of custom Borsora kaba hap ha South West Khasi Hills ban dawa pynsangeh ïa ka jingshalan dewïong lyngba ka Borsora sha Bangladesh.
Hynrei ka seng ha katei ka jingleit hiar sha Borsora haba ka la ïoh ban kylli pyrthew na ki kali ki la ïathuh ba ïa u dewïong la kit na Nongjri, Nonghlam bad Kulang ym u dewïong ba wanrah na shabar ka Jylla. Bad la kit ruh 18 haduh 20 ton ym kumba la buh da ka Sorkar ba la shah ban shalan dewïong ban kit ruh tang 12 ton. U Bah Lamphrang u la ong ba na ka por sha ka por ka sorkar ka ju ud ba kyrduh pisa hynrei ïa ka spah mariang ka la shu pynsepei bad ong ruh ba ka seng kam pyrshah ïa ka jingailad biang ka sorkar ban shalan dewïong hynrei ka pyrshah namar ba ka jingkit ïa u dewïong kam ïahap satia kumba la ai jingbit da ka sorkar.

Leave A Reply

Your email address will not be published.