Mairang, K’lyngkot 24: Ka Seng NPP wat lada kadei ka Party kaba heh tam ha jylla Meghalaya, hynrei na ki 60 tylli ki Constituency jong ka jylla, kane ka Seng ka la pynïeng tang 58 tylli. Na ki artylli kiba ka khlem pynïeng, ka Mairang kadei ka Constituency kaba ka khlem pynïeng kyrtong.
Kane ka jingbym pynïeng kyrtong ka NPP na Mairang, ka la pynlong jong ka VPP, u Bah Damewanhi Rymbai, uba long ruh u kyrtong ka Seng na Khliehriat Constituency. Haba kren ha ka jingïalang paidbah jong ka VPP ha Pyndengumïong Mairang, u Bah Damewanhi, u la ong ba ka don kaei kaei kaba rieh ha lyndet bad ka NPP ka khlem buh kyrtong na Mairang ba da kata ka long ba ka don ka jingïadei kaba sop sop hapdeng ka NPP bad ka UDP ban ïatreilang ynda ladep ka elekshon. “Hato phi ki paidbah phin dang ailad ïa ka UDP kaba la ïatreilang bad ka Party kaba leh shiliang khmat ïa ngi?”, la ong u Damewanhi. U la ong ba ka sorkar MDA ha ka jingïalam kine ki artylli ki Party kiba kham heh, ka la jyllei ka bamsap ka bampong bad ki paidbah ki la mad buh ki jingeh ha kiba bun ki liang.
U Bah Shanlang Warjri, kyrtong ka Seng na Mairang u ban ïakhun pyrshah ïa u Bah Metbah Lyngdoh jong ka UDP bad Bah Batskhem Ryntathiang jong ka Congressu la ther tyngeh ïa ki nongmihkhmat jong ka Mairang da kaba ong ba kidei ki khawpud, ki bym ju nud ban kren ïa ki mat ne ki jingeh jong ki paidbah ha Assembly. “Phim ju nud ban kren eiei ha Assembly, hynrei mynta phi kwan pynbieit ïa ki paidbah da kaba shu ïam”, u la ong. U la ong ruh ba ka daw ba ka jylla ka sahdien ha kine ki sanphew snem kadei namar ka jingbymler ki nongmihkhmat ha ka jylla. “La sanphew snem, ki paid Khasi ki la shu long tang ki nongdie waidong bad ki nong khang jingkhang ha ki dukan jong ki Marwari. Ka la dei ka por ban wanrah ka jingkylla”, la ong u Pastor barim jong ka KJP Synod Sepngi.
Shuh shuh u la ong ba ka Seng Congress kaba la synshar khambun ïa ka jylla ha kine ki sanphew snem ba kjit lut ïa ka spah ka phew jong ki paidbah, mynta kan wan sha ki paidbah pat ban ong ba dei tang ma ka, kaba lah ban ai jingïada ïa ki Khristan. “Lada ki Khristan ki dang shaniah ha ka Congress ban ïoh jingïada, ka bha ban nai duwai shuh ha U Jisu”, u la ong.
Kum uba la mih shakhmat ban ïakhun ïa kane ka elekshon, u Bah Warjri, u la ong ba ka VPP ka wanrah ka jingkular hakhmat jong ki paidbah ka Mairang ban pynïoh ïa ka jingsynshar kaba khuid ba suba kaba lait na ka jingbamsap bad dei tang kane ka lynti kaba lah ban wanrah ïa ka roi ka par, ka ïoh kam ïoh jam bad ka jingkiew ka rep ka riang.
I Samla Aibandaplin Lyngdoh Nonglait, kyrtong ka VPP na Mylliem, i la ong ba ka jylla ka la mad ïa ka jinglehraiñ ha kiwei pat ki para jylla jong ka ri India namar ka jingjyllei ha ki kam bamsap bampong kaba la pynlong ïa ki paidbah ban nang hiar arsut ha kiba bun ki liang, katba kiwei ki jylla pat ki la nang kiew sha jrong ha kiba bumn ki bynta. “Ka daw ka long namar ba ka la shong kulai ka bamsap bad kam don ka jingsynshar kaba khuid ba suba”, i la ong, da kaba bynrap ba dei tang ka VPP kaba la nud ban kular ban ïaleh pyrshah ïa ka jingbamsap da kaba kan khyllie ïa ka jingpyllut kaba haduh 816 klur ha ka jingïaleh pyrshah ïa ka jingpang COVID ha jylla.
U Bah Brighstar Marbañiang, kyrtong na Mawlai, u la ong ba haba ïanujor bad kiwei pat ki jylla jong ka thaiñ shatei lammihngi, ka Meghalaya ka don ha trai duh ha baroh ki liang, la ka long ha ka pule puthi, ha ka koit ka khiah, ha ka ïoh kam ïoh jam. U la ong ba kane ka long katkum ka Report jong ka Niti Ayog, kaba dei ka bor ban peit ïa ka roi ka par ha ri India. “Nga sngewlehraiñ ban ïakynduh ïa ki paralok na ki jylla ka thaiñ shatei lammihngi, ki jylla bym don eiei kum ma ngi, hynrei kiba la roi pat ha kiba bun ki liang”, la ong u Bah Brightstar.
U Samla Mayborn Lyngdoh, kyrtong ka Party na Pynthorumkhrah, u la ong ba u Tirot Sing Syiem uba la mih na Mairang, u la ïoh ïa ka nam ka burom haduh mynta kadei namar ba udei u ba trei hok, kiba shlur bad uba ïeng ha ka jingshisha. Ka Party UDP ruh ka ïeng ha kata ka nongrim ban ïeng ban shakri ïa ki paidbah. U la ong ba ka Party kam shym la wan sha ki paidbah da kaba shu pynbieit pisa, hynrei ka wan beit ban wanrah ka jingsynshar kaba khuid bad kaba shisha. Kiwei ki lah ban wan tyrwa da ka pisa bad ki lada ki tyrwa dei ban shim beit bad ym dei tang ban shim, hynrei dei ban kham bun, namar kadei ka pisa jong u paidbah lyngba ka skhim MLA.
