Shillong, K’Lyngkot 24: U kyrtong ba ka All India Trinamool Congress (AITC) ka la pynbna ba un aireng na ka tiket ka party na Pynthorumkhrah Constituency u Bah Samborlang Diengdoh ha ka sngi Ba-ar u la pynbna paidbah ba u la rai ban mih noh na ka AITC bad ïakhun noh pat kum u kum u kyrtong shimet ha kane ka ilekshon ban sa long ha u Rymphang.
Haba kren bad ki lad pathai khubor u Bah Samborlang u la ïathuh ba ka jingleit jong u ban ïasoh sha ka AITC ha ka 20 Nailar 2022 hynrei hadien ba la sdang ka jingïalap ilekshon u la iohi ba ka jur bha ka jingïakawang ktieh hapeng ki seng sain pyrthei kaba long kaei kaei pat kaba u hi um sngew mynjur ïa kum kane ka rukom.
U Bah Samborlang u la ïathuh ba ka daw ba pynlong ïa u bah mih noh naka AITC kadei hi ban trei da ka ba ïatei lang ym ban ïa kawang ktieh ne beiñ para Party.
“Naduh ba la nga rai ban ïakhun ïa ka ilekshon 2023, nga kut jingmut ban ïaid da ki sienjam ban ïatei lang da ki kam lyngba ka rynsan seng saiñpyrthei ym ban ïa kawang ktieh bad dei namar nga la rai ban ïakhun noh kum u kyrtong shimet khlem da ïasoh bad kino kino ki Party” u la ong.
