Kren da ka jingtip wat pynlehraiñ ïa lade bad ka Constituency ong u MP ïa u MLA

Shillong, Naiwieng 22 : U President ka NPP ha kane ka jylla u Dr Kharlukhi u la ther da kaba tyngeh ïa u MLA jongka North Shillong Constituency u bah Adelbert Nongrum da kaba u la kyntu ïa u ban kren da ka jingtip ym ban shu kren lap lah namar ka pyni lehraiñ ne u die tad dor ym tang ïalade shimet hynrei wat ïa ka Constitueny kaba u mihkhmat hi ruh.
U la ong ba ha ka por ba wanrah ïa ka Citizen Amendemnt Bill hapoh ka ïing dorbar thawaiñ Parliament um pat dei wat tang u MP ruh namar ïa kane ka Bill la wanrah nyngkong ha ka 8 tarik Kyllalyngkot 2019 hynrei hadien ba ka la dier noh ka por bad kam treikam shuh la wanrah biang ïa ka ha ka 9 tarik Nohprah 2019 bad ka la ïoh ka jingmynjur ha ka 10 tarik Nohprah 2019 bad ha katei ka por ka MP Rajya Sabha ka dang dei ka kong Wansuk Syiem.
“ U bah Adelbert um tip ei ei hi ruh ïa kata namar haba long ka election jied MP Rajya Sabha ruh u khlem wan thep vote hi ruh bad ka la dei hi ïa uba pli ban shu kren ruma rutit, hynrei kane ka jingkren jongu pat ka pynlehraiñ ym tang ïa u shimet hynrei ka ktah jur wat ïa ka Constituency ba u mihkhmat hi. Kumta kum u nongmihkhmat paidbah haba u kren u dei ban da tip bniah bha ym ban shu kynnoh mata madei lada um tip ïa ki jingshisha baroh. Kum u nongïalam ka NPP ha ka jylla ngi naduh ba sdang ngi pyrshah ïa ka CAB kaba la long mynta ka CAA bad haduh mynta ruh ngi ïeng ha ka nongrim ban pyrshah beit ïa kane ka aiñ bad dei ruh da ka jingshim khia u myntri rangbah u Conrad K Sangma ban leit ïakren sha Delhi ba kane ka aiñ ka khlem treikam ha ka jylla bad ka jingïai bud dien ka long ba dei ban lait ha baroh kawei ka jylla ym tang ki jaka ba hap hapoh ki District Council” ong u Dr Kharlukhi