Kob ka BJP ban jop katto katne tylli ki constituency na KHADC bad JHADC mynta ka elekshon

Shillong, Rymphang 22 : Ka Bharatiya Janata Party (BJP) Meghalaya ka la kob ba ki don ka jingkyrmen ba kin jop katto katne tylli ki constituency ha kane ka elekshon MDC kaba dang shu dep shen la ka long ha ki constituency jong ka Khasi Hills Autonomous District Council (KHADC) bad ruh ha Jaintia Hills Autonomous District Council (JHADC).
Haba kren bad ki lad pathai khubor ha kane ka sngi Saitjain, u General Secretary ka BJP, Bah Wankitbok Pohshna u la ong, “Ngi don ka jingkyrmen namar ki don katto katne ki constituency kiba ngi don ka jingsngew skhem ba ngin jop.”
Une u heh BJP haba jubab halor ka jingkylli kaba ïadei bad ka jingslem palat ban pynbna ïa ki kyrtong ha kane ka elekshon u la ong ba kum ka party kaba la trei beit baroh san snem kam sngew phylla ïa kata. “Ka party ka trei baroh san snem ban pyntreikam ïa ki prokram kiba wan naduh na jrong bad shaduh baroh ki jylla. Kumta ngam sngew don ban ong ba ka jingslem ban pynbna kyrtong kan don jingktah namar kan ym don jingeh ïa ki paidbah ban jied ïa ki briew kiba bha,” u la ong.
Shuh shuh u ong ruh ba lada ki paidbah ki bishar bnïah ïa ki kam kiba ka sorkar BJP ka leh kam don satia ka jingkylli lada ka party ka pynslem ban ai tiket ruh namar khatduh kin peit ïa ka kam.
“Ki kam kiba bha ba ka party ka tyrwa nga ngeit ba lada ki paidbah ki sngewthuh kan ym eh ïa ki paidbah. Watla ka jingïadei bad ki kyrtong ka donkam hynrei ha kaba khatduh ki kyrtong hadien ba ki la jop ki hap beit ban bud ïa ka jingbthah jong ka party,” u la bynrap biang. Kumta u ong ba ki paidbah lada ki sngewthuh kan ym don jingeh naba ka jingkynduh bad ki ka long beit kaba ïai bteng man ka por.
Utei u heh BJP u kubur ruh ba watla ka party ka don bun ki nongkitkam thynrei ka jingeh ba ki kynduh ka long ba kim pat lah satia ban pynpoi lut sha ki paidbah ïa ki jingmyntoi bad ki prokram kiba ka sorkar pdeng ba ïalam da ka sorkar BJP ka leh na bynta ki paidbah.
“Ngi dang pyrshang bad ngin ïai pyrshang ba ngin lah ban pynshai bad pynsngewthuh ïa ki paidbah da ka thong ba ha kawei ka sngi ngi ruh na ka party ngin lah ban thaw ïa ka sorkar ha kane ka jylla,” u la ong.
Lah ban kdew hangne ba ka BJP ka la pynieng haduh 14 ngut ki kyrtong ha kane ka elekshon MDC na KHADC bad tang katto katne ngut na JHADC.