Kob ka BJP ban jop haduh 400 ngut ki MP, kynthup lang ïa ka Shillong bad Tura

Shillong, K’Lyngkot 04 : Ka BJP ha ka sngi Palei ka la kam ba ki buh thong ban jop haduh 400 ngut ki kyrtong ha kane ka elekshon MP sha Lok Sabha kaban long shen mynta u snem.
Haba kren bad ki lad pathai khubor hadien ka jingïalang pynkhreh elekshon jong ka party, u National Vice President ka BJP, u Dr. M Chuba Ao u la ong, “Ka thong jongngi ka long ban jop haduh 400 ngut mynta kynti. Kumta, ngi hap ban leit kylleng ban pynsngewthuh ha kito ki jaka kiba ngi khlem lah mynshwa bad ngin pyrshang lut ki lad ki lynti ban poi sha ki.”
Da kaba pynpaw ba ka jinglong jingman ka party ka pynïoh mynsiem bha mynta, utei u heh BJP u pynpaw ruh ba ki don ka jingsngewskhem ba kin ïoh ban poi sha ka thong.
Haba pynshai pat halor ka jingong ba ki don ki jaka kiba khlain bad kiba kham tlot, u Chuba Ao u la ong ba ka shong katkum ki jaka, don kiba hap ha ka thain shatei lam-mihngi jong ka ri bad ong ruh ba ha kito ki jaka ba kham tlot kin pyrshang ban trei borbah khnang ban poi sha ka thong.
Shuh shuh haba jubab pat halor ka Shillong bad Tura, utei u heh BJP u la pynpaw ïa ka jingkyrmen ba ka jingïakhun ha kine ki ar constituency ruh ki don ka jingkyrmen.
Hynrei haba pynshai pat halor ki kyrtong na bynta kitei ki constituency, u Chuba Ao u la ong ba ka kam jong ka party ka long ban trei shwa bad sa jied ïa ki kyrtong kham hadien da ka jingsyllok bad ki nongïalam ka State BJP haba ïadei bad ka jingai tiket.
U la pyntip ruh ba ki la bun bha kiba pan tiket na ka party hynrei ka nongrim jong ka party ka long ban jied ïa u briew uba ki paidbah ki lah ban pdiang.
Haba kylli pat la ka party kan sei da u MLA ka Pynthorumkhrah uba dei ruh u Myntri ka sorkar jylla, Bah AL Hek ban aireng na Shillong seat, na ka liang u Ao u la ong ba u la shu ïohi tang ha ki lad pathai khubor ïa kitei ki jingkwah jong u Bah Hek tangba um pat ïohlad ban kren markhmat bad u.
“Ha ki ar tylli ki elekshon ba la dep ngi la ïohi ba kam da long haduh katta katta tangba mynta pat ka la kham pher shibun bad ngi pynkhreh ruh ban trei ha kata ka rukom ba ki paidbha kin sngewthuh ïa kaei kaba jïa ha ka Ri baroh kawei. Ngin leit ruh ban pynsngewthuh ïa ki haduh ki shnong ki thaw khnang ba kin ngam jylliew ïa ka thong treikam jong ka party,” u la ong.
Ha kajuh ka por pat u la ong ba ka BJP kan ïa khun hi ha kane ka elekshon Lok Sabha khlem da ïateh lok badno badno ruh. “Ngin ym ïateh lok bad kiwei pat ki sengsaiñ pyrthei, ngin trei borbah hi dalade. Balei ngin shu ailad suk ïa kiwei, na kata ka daw ngi la rai ban ïakhun hi tang marwei hi khnang ba kan ym don kano kano ka jingsam bhah ïa kiwei,” u la bynrap biang.