Suki ka jingtrei ïa ka surok Mawphlang- Mawsynram, syier ki paidbah ïoh long kum ka surok Pynursla

Shillong, K’lyngkot 04: Ka surok na Mawphlang ter ter sha Mawsynram bad kaba poi ruh shaduh Balat, Hat Mawdon bad sha ki bynta jong ka Ranikor, wat lada ka long ka surok kaba rit, hynrei ka long ka surok kaba donkam bha haduh katta kata namar ka pynïasoh ïa ka nongbah Shillong bad ki hajar tylli ki Shnong kiba don ha khappud bad ka Bangladesh.
Ka sorkar jylla ne ka tnad PWD lyngba ka jingmang pisa ne ka skhim na ka sorkar pdeng ka la pynbha ïa kane ka surok kaba la shu ieh kumto la bun bun snem.
Ha kiba bun ki bynta la tih pynheh ïa kane ka surok khnang ban kham kylluid ka leit ka wan. Na ka liang ki paidbah ruh ki la pynpaw ka jingsngewkmen ba kane ka surok hadien ba la shu ieuh kumto la bun tylli ki snem mynta ka sorkar ka la sdang ban moramot.
Hynrei kiba bun ki paidbah ki la pynpaw ka jingsngewkhia pat ba ka jingtrei ïa kane ka surok ka suki palat bad ka la wanrah pynba ka jingeh ia ki paidbah nongleit nongwan namar kane ka jingmoramot ka la wanrah ka jingthut ha ka leit ka wan ha kaba la don ka jingtih ha kiba bun ki bynta. Kane ka la ktah ruh wat ïa ki kali Ambulance kiba kit ïa ki nongpang bad ki la hap ban shu ïaid suki suki namar ka jingsniew ka surok. Ki paidbah ki ïohi ba lada ym trei kloi ne pynsted ïa kane ka jingtrei ïa ka surok kan wanrah ka jingeh kaba khraw ynda la wan ka por slap ne ka lyiur.
Na ka liang u Dr. Rusievan Shangpliang, uba long u Organising Secretary ka Seng VPP Mawsynram, u la pynpaw ka jingsngewkhia halor kane ka jingsuki palat ka jingtrei ïa kane ka surok. U la ïathuh ba kiba bun ki paidbah ki la wan ud sha ka VPP ban pyntip sha ki bor ka tnad PWD halor ka jingsuki ha kaba pyntrei ïa kane ka surok. Na ka lian jong u hadien ba u la wan jurip ïa kane ka surok, u kyntu ïa ka tnad PWD ban bthah ïa ki kontraktor ba pyntrei ïa kane ka surok ba kin pynsted ïa ka jingtrei ïoh lap ba wan u slap bad kan buh jingeh ïa ki paidbah. U la ong ba um kwah ban ïohi ba ka surok Mawphlang- Mawsynram ter ter kan slem ka jingtrei kumba slem ka surok Umshyrpi- Hynñiewmer, ha kaba la shu sdang ka jingtrei hynrei la hap ban sangeh noh pat kynsan kynsan. “Ki paidbah kim kwah ba kane ka surok na Mawphlang sha Mawsynarm bad sha kiwei pat ki bynta jong kane ka thaiñ kan slem kumba slem ka surok Umshyrpi sha Hynñiewmer ne ka surok Pynursla- Dawki”, la ong u Dr. Shangpliang.
U la ong ruh ba ka surok kaba pynbha tang 30 Km kan shim por da ki bnai te ka long ka bym lah ban pdiang satia bad ki paidbah ruh kim pdiang ïa kane ka jingtrei kaba suki bad pynjynjar ïa ki.