Shillong, K’lyngkot, 04: U MDC barim jong ka GHADC na Balachanda u Sofior Rahman u la dawa ba dei ban thung da ka jingtohkit kaba laitluid halor ka jingkynnoh ba ka don ka jyrsieh bamsap ha kaba pyntreikam ïa ka Jal Jeevan Mission (JJM) ha West Garo Hills District.
Ha ka shithi ujor sha u Secretary jong ka Central Vigilance Committee (CVC) ka Sorkar India u Rahman u la kyntu ba dei ban thung da ka jingtohkit halor ka jingpyntreikam ïa ka skhim JJM bad ban pynshitom ïa u Chief Engineer ka tnat PHE, Meghalaya, ïa ka TPIA, NEDfi, Guwahati bad ïa ka M/s BAC INFRATECH PRIVATE LTD, Tura halor ka jingkynnoh ba ki donkti ha ka bamsap.
U la kynnoh ba ki don byllai ki kam bamsap ha ka jingpyntreikam ïa ka JJM ha West Garo Hills District bad ong ruh ba ka tnat PHE ka la pyni ïa ka jingpynlut khlem da pyntreikam pat ïa ka skhim JJM ha ki bynta rithor jong ka West Garo Hills district.
Une u MDC barim u la kynnoh ruh ba ka jingthmu ban shna pynheh ïa ka Nekikona Combined Water Supply Scheme “Id 8394205” kam shym pat treikam haduh mynta katba ïa ka pisa ba ladep mang ladep sei da ki kontraktor/Firm/Company.
Ïa kane ka skhim la mang pisa ha u snem 2021-22 bad la buh thong ban shna pyndep ha ka 31 tarik, Nohprah, 2023. Ka dor ka projek ka long haduh T. 6036.03 lak katba ïa ka jingpynlut la pynpaw ba ka long T. 5148.71 lak.
U la ong shuh shuh ba ka jingtrei ka dang long tang 20% ha madan. “Ym pat don wat tang kawei ruh ka longing ban ïoh tan um sha ka shnong bad ki nongïoh bhah lyngba kane ka skhim/projek bad bynrap, “ha ki kot ki sla lane ha ka Jal Jeevan Mission-IMIS, ka pynpoi ïa ka um ka la paw ba la sam sha ki nongïoh bha ne sha ki shnong. Ka Office ne Company ne ka Firms ne ki kontraktor shimet ki ladep sei ïa ïa ka pisa ba la pynlut T. 5148.71 (lak) na ka jingmang pisa ïa ka skhim kaba kot T. 6036.03 (lak) katkum ka kaiphod jong ka tnat PHE.
Ka kam na ka bynta ka jingpyntreikam ban shna pynheh ïa ka Nekikona combined WSS la aiti sha ka “M/S BAC INFRATECH PRIVATE LTD” bad ka North Eastern Development Finance Corporation Limited (NEDFi), Guwahati ka la shah thung kum ka Third Party Inspection Agency (TPIA).
U la kynnoh shuh shuh ha ka shithi ujor ba u Chief Engineer jong ka tnat PHE ryngkat bad ka Firm bad TPIA ki donkti ha ka jyrsieh bamsap ha kaba pyntreikam ïa ka skhim JJM.
