Shillong, Nailar 17: Ka Seng Voice of the People Party (VPP) mynta ka sngi ka la phah biang da ka jingthoh sha u Myntri Rangbah ka jylla, u Conrad Sangma ban pynkynmaw ïa ka jingthung ïa ka Expert Committee na ka bynta ban pynbha ïa ka Reservation Policy.
Ka jingthoh ba la soi da u Dr. Ricky AJ Syngkon, General Secretary ka Seng, la ong ba ha ka jingïakynduh ki nongïalam jong ka Seng bad u Myntri Rangbah ha ka 13 tarik u Naitung 2023, u Myntri Rangbah u la ong ba ka jingthung ïa ka Expert Committee ka la jan dep artad bad kaba sah ka long satang ban jied ïa u Chairman. U Dr. Ricky, u la ong ruh ba u Myntri Rangbah u la ai ktien ruh ba ka jingjied ïa u Chairman ruh kam slem shuh ka sah satang ar ne lai taïew.
“Phi la ong ba ban thung ïa u Chairman kam slem shuh bad ka shim por satang kumba ar ne lai taïew. Hynrei mynta la shi bnai ym ïohi dak eiei”, la ong u Dr. Ricky ha kane ka jingthoh sha u Myntri Rangbah ka jylla. Na ka liang ka Seng ka la dawa ba dei ban pyndep noh ïa kane ka kam kaba la shu sahteng hadien ba ka sorkar ka la pdiang ïa ka jingdawa ka VPP ban thung da ka Expert Committee ban peit bniah ïa ka jingpynkylla ïa ka Reservation Policy kaba la shu ieh kumto la palat sanphew snem.
Kane ka jingkular ka sorkar ban thung da ka Expert Committee ka long hadien ka jingïakhih shah thngan ba khlem pud dau Bah Ardent Basaïawmoit, President jong ka Seng ha kine ki bnai baladep.
