Shillong, Naitung 30 : U Myntri ka tnad Tourism ka Sorkar Jylla, u Timothy D Shira u la ong ba ka Sorkar ka la pynthikna ba ïa baroh ki jingbit kiba donkam, kynthup ïa ka Forest Clearance bad Environmental Clearance Certificate, la dep ban ïoh shuwa ban sdang ïa ka projek Shillong Ropeway.
Watla katta ruh u ong ba ka sorkar ka long kaba kloi ban jingïasyllok bad ki paidbah ban weng ïa kino kino ki jingsngewkhia halor ka projek.
Ïa kane la ong da u Myntri ka tnat Jngohkai Pyrthei, u Timothy D. Shira, ha ka sngi Palei haba jubab ïa ki jingkynnoh ba kane ka projek ka lah ban ktah ïa ki dieng bad ki tyllong um.
“Ka projek kam dei kaba la sdang ha ka por ba nga bat ïa ka tnat. Hynrei na ka liang ka tnat la pyntip ha nga ba la pyndep ïa baroh ki jingdonkam bad la ïoh ïa baroh ki jingbit na ki bor ba dei peit shuwa ban sdang ïa ka kam,” la ong u Shira.
U Myntri u la ban jur ba ka projek ka la ïoh ruh ïa ka jingbit na ka tnat Khlaw bad ïa ka Environmental Clearance Certificate, kumta um tip ba dang don kiba ong ba dang bun ki jingbit kiba ym pat ïoh.
“La ïoh ïa ka Forest Clearance bad ïa ka Environmental Clearance Certificate. Ki ophisar ka tnat ki la pyndep ïa baroh ki kam kiba donkam shuwa ban sdang ïa ka projek. Kumta ngam tip kaei kaba dang sah ban leh,” u la ong.
Watla katta, u Myntri u la ong ba ka sorkar kam pyrshah ïa ka jingïakren bad jingïasyllok bad ki paidbah lada donkam, khnang ban pynduh ïa ki jingsngewthuh bakla bad ka jingbym ïoh jingtip kaba biang.
“Lada donkam jingïasyllok, ka sorkar kan leh ïa kata. Ka long kaba donkam ban weng ïa ki jingsngewkhia, ki jingsngewthuh bakla bad ka jingbym ïoh jingtip khnang ba baroh kin sngewthuh bha ïa ka projek,” la bynrap shuh shuh u Myntri.
