Pynrem bad weng dkhot shipor ka SBA ïa u nongïasaid aiñ ba jrongkti ïa ka samla pule

Shillong, Naitung 30 : Ka Shillong Bar Association (SBA) ka la pynrem jur ïa u Nongïasaid Aiñ u AH Hazarika uba la shah kynnoh jrongkti bad leh kynshleiñ ïa ka samla pule Law (Ain) kaba wan ban shah pyntbit (intern) ha u. Nalor kane ka SBA ka la weng ruh ïa ka jinglong dkhot jongu shipor katba ka jingtohkit ka dang ïaid shakhmat. Ha kajuh ka por ka SBA ka pynrem ruh ïa ki briew kiba la shoh bad pynïaid ïa une u Nongïasaid aiñ ha ki katto katne ki bynta ka sor Shillong ryngkat ka jingphah bat shkor.
Ka Executive Committee jongka SBA ka la ïa kynduh ha ka 29 tarik Naitung hadien ba la saphriang ki video ba pyniaid kjat ïa utei u Nongïasaid Aiñ ha ki katto katne ki bynta ka sor Shillong da ka seng HNYF.
Kat kum ka kyrwoh khubor ba la pyllait da u President u H.R Nath bad u Secretary P Jyrwa la pynpaw ba ka SBA ka pynrem jur ïa katei ka jingjia ba la leh da u AH Hazarika pyrshah ïa ka samla ba wan shah pyntbit ha u.
“ Kaba kum kane ka jingjia lada lap ba ka long kaba shisha ka la long ka jingpynjah burom ïa ka kam ki Nongïasaid Aiñ ïa kaba ym lah ban pdiang da lei lei ruh” ong ka kyrwoh.
Haba shim ba kane ka kam ka long kaba sngewjah burom tam bad kaba dei ruh ban shim khia bha, ka SBA ka la rai ban khot hajir ïa u Hazarika bad ban leh ruh da kaba tyngeh pyrshah ïa u khamtam ha kaba ïadei bad ka jinglong dkhot hapoh ka SBA katba ka jingtohkit ka dang ïaid shakhmat da ki bor Pulit bad kumjuh ruh na ka liang ka Disciplinary Committee jongka State Bar Council (SBC).
Ha kajuh pat ka por ka SBA ka pynpaw ruh ka jingsngewkhia jur halor ka jingshim ïa ka aiñ ha kti da ki katto katne ngut ki briew kiba kam ba ki dei ki dkhot ka HNYF ban pynïaid kjat ïa u ha ki katto katne ki bynta ka nongbah Shillong. Ym tang ba pynïaid kjat hynrei ki la shoh la bom shwa ïa u bad sa pynïaid da ka kjat naduh Keating Road shaduh Sadar Police Station.
Hooid wat la ka long kumno kumno ruh ym dei pat ban leh kumtei ïa u namar ym don hok pat ban leh ïa u kumtei. Kane ka pynpaw ba kitei ki briew ki la shim ïa ka aiñ ha kti jongki bad ïa kane ym lah ban pdiang satia namar ki la ïaid lait ïa ki bor ka aiñ. Kumta ka SBA ka kyntu bad ai jingkyrshan ba dei ban tohkit bniah halor kine ki jingleh kumba tohkit ïa u Hazarika ruh.
Ha kawei pat ka liang ki Pulit ka Sadar Police Station, kila pynngat ha ki artylli ki kyndon ka aiñ Bharatiya Nyaya Sanhita (BNS) pyrshah ïa u Hazarika uba shah kynnoh jrong kti khlem akor ïa kawei ka samla pule law ba wan leh intern bad u.
Ki Pulit ki la register case pyrshah ïa une u nongïasaid aiñ hapoh ka Sadar Police Station Case No. 265/2026 bad pynngat hapoh ka kyndon 74 bad 75 jong ka Bharatiya Nyaya Sanhita (BNS).
ïa kane ka case la register halor ka ejahar bala mudui da kane ka samla ha ka sngi Ba-ar, kaba la kynnoh ba kane ka jingjia ka la jia katba ka dang leit leh intern hapoh ka jaka treikam une u nongïasaid aiñ kaba don marjan ka Goenka Engineering Works.
La kynnoh ruh ba une u nongïasaid aiñ ula pyrshang ban tyrwa ïa ka da ka pisa bad kyrpad ba kan wan ïakynduh biang ïa u ha ka sngi Saitjain. Kane ka samla, kala pyntip ïa la ki paralok parajor hashuwa ba kan leit sha ki Pulit ban buh ïa ka jingujor.
U Superintendent of Police (City) Bah Dangsan Khyriem ula ong ba ïa kane ka jingujor la mudui ha ka 28 tarik Naitung bad ïa ka case la register hapoh ka Bharatiya Nyaya Sanhita. Une u Heh Pulit u pyntip ba ka jingtohkit kala sdang ban pynthikna ïa kaei kaba jia bad ban leh ïa kaba donkam kat kum ka aiñ.