Shen yn sa ïoh biang ki kali ban ïaid na ka jaka ba shah rong ka surok Shillong-Dawki

Shillong, Naitung 30: Ka bynta jong ka surok Shillong-Dawki kaba la julor na ka jingshah rong ha ka um, la khmih lynti ban ïoh ïaid biang ki kali hapoh jong ka shi taiew, la ong u Symbud Myntri Rangbah ka Jylla uba khmih ïa ka PWD (Roads) u Bah Prestone Tynsong hynne ka sngi Balang.
U Bah Tynsong ula iathuh ba la shna ïa ka surok Sub-Way hadien ba ka la don ka jingshah rong noh jong ka surok bad ki kam ki jam mynta ki la ïaid ha ka wat kaba khatduh.
“Nga dap da ka jingkmen ban pyntip ba ka jingshna ïa ka Sub-Way ka dei kaba lah jan dep lut ha ka wat kaba khatduh. Ki kam ki jam ki la ïaid miet bad step bad nga ngeit skhem ba hapoh jong ka shi taiew, ngin sa lah ban pyndonkam biang ïa ka surok Shillong-Dawki” ula ong ha ki nongthoh khubor.
Katkum ka jingong u Bah Tynsong, la dep ban bthah ïa ka NHIDCL bad ïa ki bor kiba dei khmih ban trei sted ïa katei ka kam.
Ula bynrap ba ula ïakren man la ka por bad ki bor pynïaid district, u DC, SDO Civil bad ki ophisar jong ka PWD ban khmih bniah ïa ka jinglong jingman jong ki kam ki jam.
U Symbud Myntri Rangbah ula pynshai ba ka Shillong-Dawki Road kadei ka projek kaba la pyntreikam da ka Sorkar India lyngba ka NHIDCL hapoh jong ka Ministry of Road Transport and Highways bad kam dei satia ka sorkar jylla kaba khmih bad peit ïa katei ka projek.
“Na ka liang ka jong ngi, ka sorkar jylla bad ka tnad PWD, ngi dang ïatreilang bad ka NHIDCL. ïa kino kino ki mat ne jingeh kiba ka don, ki bor district ki ju leit ban tuklar. Kata ka dei ka kamram jong ka Sorkar Jylla” ula ong.
“Ngi lah dep ban pynpaw hakhmat ka jongki bad ngi lah dep ong ïa ki ba ki dei ban pynthikna ba ka jingïaid jong ki kam ki jam ka dei ban long kaba sngewhun” ong u Bah Tynsong.