Nongstoiñ, Rymphang 09: Ka jingïalap election ha kine ki sngi ka la shongshit bha ha man la ki jaka, ha kaba ki kyrtong jong kawei pa kawei ka seng saiñ pyrthei ki la pynksan ïa la ki jong ki nia bad pynshai ïa la ki jong ki nongrim ba ki party jong ki, ki la buh ban trei na ka bynta ban wan rah ïa ki jingmyntoi sha ki paitbah.
Ha ka sngi saiñ jain, ka jingïalap election ha Nongstoiñ ka la sdang ban shongshit bha ha kaba lai ngut ki kyrtong ka kong Badariti Lyngdoh Nonglait ka kyrtong jong ka Hill State People Democratic Party, u bah Apsharailang Syiem u ba la mihkhmat na ka bynta u bah Dressar Marngar kyrtong ka National Peoples Party bad u bah Michael Thongni u kyrtong shi met, ki la kiew lang ha ka juh ka rynsan ha Market Complex ha khmat ïew Nongstoiñ ban pynshai paitbah ïa ki mat treikam bad ban kyrpad ïa ki paitbah ba kin ai ka jingkyrshan ha ka elction MDC ka ban sa long ha ka 21 tarik mynta u bnai.
Ha katei ka sngi ka la pynïaid ïa ka jingïalap election da u bah G.Marbañiang secrrtary ka shnong New Nongstoiñ, ha kaba ka kong Badariti Lyngdoh Nonglait kyrtong jong ka HSPDP, ka la ïoh ban kiew nyngkong ha ka rynsan ïalap election ha kaba la synran lang da ki nongkitkam ka party, ki riew rangbah, ki longkmie bad ki samla na kylleng ki shnong kiba marjan.
La wan ban ïadon ryngkat ruh da u bah Wallyson Sohlang Working president ka HSPDP Mawthadraishan bad kiwei ki para nongkitkam jong ka party na katei ka costituency, u samla Pynshai Joel Dkhar secretary ka HSPDP Youth Wing central body bad kiwei kiwei.
Ha katei ka sngi la ïoh nyngkong ïa ka jingpynshai na u bah Markos Marweiñ secretary ka HSPDP Nongstoiñ constituency, ha kaba u la pynshai ba ka ïaleh election jong ka kong Badariti Lyngdoh Nonglait na Nongstoiñ, kam dei ba ka kwah hi hynrei ka dei ka jingkwah jong ki paitbah ha kaba ki nongïalam jong ka party ki la leit ban wer ïa ka namar ka don ïa ka jingangnud ban pynim biang ïa ka party. Kumba ka long ha kine ki sngi da ka jingwan jong ka sa shisien pat ka party ka la khie im biang bad ka don ruh ka jingkyrmen ba kan poi sha ka thong ka jingjop.
Ha kajuh ka por la ïoh ïa ka jingkren na u bah Wallyson Sohlang Working president ka HSPDP Mawthadraishan. U bah Sohlang haba pynshai sha ki paitbah ha u la ong ba ha ka jingshisha ka kong Badariti, ka dei ka khun trai jong ka Mawthadraishan bad ka dei ruh ka khun pyrsa trai jong u (L) Maieit Hopingstone Lyngdoh na ka shnong Mawkyllei.
Hynrei hadien ba ki paitbah ka Nongstoiñ constituency ki la I donkam ïa ka ba kan wan ban ïaleh election ki paitbah ka Mawthadraishan, da ka jingsngewieit ki la shah sngewbha, namar ki la ithuh shai ba dei sa tang ka kong Badariti kaba don ïa ka hok ban mih bujli na ka bynta u (L) Maieit Hoping khamtam eh ha ka synshar khaddar.
U bah Sohlang u la ong ruh ba u (L) Maieit Hoping kum u kpa ka jong ka Nongstoiñ constituency, u ba ki paitbah ki la ieit bad shanniah ban pynlong ïa u kum u nongmihkhmat haduh ba un da khlad noh na kane ka sla pyrthei, wat la u dei na ka shnong Mawkyllei Mawthadraishan constituency um shym la wan rah ei ei ruh, hynrei u la shakri hok ïa ka Nongstoiñ bad ka jylla hi baroh kawei.
Ha kajuh ka por u la ong ba ki paitbah ka Mwthadraishan ki ai ruh ka jingkyrkhu kyrdoh ïa ka kong Badariti bad kan poi sha ka jingjop bad ba ka dei ban shakri hok ïa ka Nongstoiñ constituency bad ïa ka jaitbynriew da kaba bud ïa ki dienjat kiba u Maieit Hopigstone u la ïalam.
Khatduh eh la ïoh ïa ka jingpynshai na ka kong Badariti Lyngdoh Nonglait halor ki mat treikam jong ka party na ka bynta ka eclection MDC. Katei ka kyrtong haba pynshai sha ki paitbah, ka la ong ba ka jingjied ïa ki nongmihkmat sha ka Ïingdorbar thaw aiñ jong ka District Council ka donkam tam, namar ka District Council ka dei ka dei kaba peit ïa ka khyndew ka shyiap, ka riti ka dustrur jong ka jaitbynriew.
Ha kajuh ka por ka la pynkynmaw ruh ba ha ki snem ba mynshuwa ha ka por ba u (L) bad H.S.Shylla u dang long kum u CEM kum ka nongïalam jong kawei ka seng ki longkmie kaba la tip kum ka STIEH, ka la long kum ka dkhot ha kawei na ki Committee bad lyngba katei ka Committee, ka la ïoh lad ban aijingmut sha ka Council ba ka dei ban thaw noh da ka aiñ kaba thikna ha kaba ïadei bad ka rkukom shim jait na ka kynthei bad katei ka Committee ka la mynjur bad hadien ba la dep ban pynbit pynbiang la ithuh da ka aiñ ha kaba u Lat ka jylla u la dep mynjur bad shon muhor.
Ka la ong ruh ba ki dang don shibun ki aiñ kiba ka Dsitrict Council ka hap ban thaw na ka bynta ban ïada ïa ka jaitbynriew bad ka hok longtrai kaba ngi dei ban bat halade ba kiwei kin ym ïoh lad ban ïuh roit.
Nalor kata ka la kren bynñiaw ruh halor ka jingkren tohmet jong ki nongïalam jong kiwei pat ki seng saiñ pyrthei halor ka jingai jait sha ka kmie, ha kaba ki la kam ba ka jingai jait ka dei ka kam shimet bad ruh halor ka jingkynthoh ba ki nongkyndong ki shongkha katba ki mon.
Halor katei ka jingkynthoh ka la ther tyngeh da kaba ong ba ki nongkyndong kim dei satia ki mrad, hynrei haduh mynta ki nongkyndong ki dang bud ryntih ïa ka jinghikai ki longshuwa. Ki nongkyndong ki dang ñiewkor ïa ka ka shongkha shongman, ki dang tip ïa ka ai kait kylliang, ka leit peit Mei kha, khun kha ,ki dang burom bad ñiewkor ïa ka jingpynïaid jong ki Kñi habaroh ki jingdon kam.
Ha kajuh ka por ka la pynshai sha ki paitbah ba lada ki Dorbar kur kin khyllem kin ïeng ki dorbar kha dei, hangta ba kan kiew ka sang ka ma bad ka jaitbynriew kan sa jot hi thiaw. Kumta lada ki paitbah ka Nongstoiñ ki kwah ba ka Jaitbynriew bad ki riti ki dustur, ki dorbar shnong, ki dorbar hima bad ki dorbar kur kin neh bad kin nag khlaiñ kin ai ka jingkyrshan ka pura.
Haba kan leit sha ka District Council kan ïaleh katba kot la ka bor ban thaw ki aiñ kiba paka ban ïada ïa ka hik longtrai halor ka khyndew ka shyiap, synshar shnong synshar thaw bad ban pynkhlaiñ shuh shuh ïa ki dorbar hima.
Ha ka rynsan ïalap Election jong ki nongïalam jong ka National Peroples Party pat ki rangbah kiba la ai jingkren ki long u bah Nicholas Marweiñ bad u bah Apsharailang Syiem. Ha ka jingïalap election jong ki u bah Syiem u la pynshai ba ki dang don shibun ki kam hapoh ka Nongstoiñ constituency, ba ki nongïalam ka party ki pat lah ban pyndep.
Hynrei lada ki paitbah kin ai ka jingkyrshan ban pynjop ïa u kyrtong ka party, un ïaleh katba lah ban pynsngew sha ka sorkar ba ka dei ban pyndep noh ïa baroh ki kam kiba dang sah teng hapoh ka constituency bad ban thaw ki lad ki lynti ban wanrah biang ïa shibun kiwei pat ki jingdon kam na ka bynta ki paitbah. Khatduh eh u bah Michael Thongni u kyrtong shimet u la shim ïa ka byta ban pynshai paitbah halor ki mat trei kam kia u la buh ha kmat eh na ka bynta ka erlection MDC.
