Nongpoh, Rymphang 09: Da ki spah ngut ki paidbah kiba dang bat ïa ka niam trai na kylleng ka them Ri Bhoi bad na kiwei ki bynta jong ka rilum Khasi Jaintia mynta ka sngi ki la leit ban shim bynta ha kaba pynkut noh ïa ka shad Suk Mynsiem, kaba dei kawei na ka jingshad tynrai ban ai ka nguh ka dem ïa u blei bad ban pan ïa kata ka jingkyrkhu ban bha ban miat.
Ïa kane ka jing Shad Suk Mynsiem kaba saw ba la pynkut noh mynta ka sngi ha ka Shnong Umtrew ha Ri Bhoi District la pynlong da ka Seng Khasi Umtrew bad la sakhi ruh ha kane ka sngi da ki riam tynrai bad ki jngput jingtep tynrai kaba la pynphuh pynphieng shisha ïa kane ka jingpynkut ïa ka Shad Suk Mynsiem, kawei na ka jingshad tynrai kiba dang bat ïa ka niam trai hapoh ka bri u hynniewtrep.
Kumba la sakhi, ha kane ka sngi ki don haduh 135 ngut kiba la shim bynta ha kane ka Shad Suk Mynsiem, kata kynthup ïa ki 70 ngut ki thei soti bad 65 ngut ki shynrang bad kine ki samla kynthei bad shynrang ha ka riam tynrai ki la shim bynta ha kane ka Shad Suk mynsiem kaba long kawei na ka jingshad tynrai hapoh rilum Khasi-Jaintia.
Nalor ki riew paidbah, ki heh niam tynrai Khasi ba la shim bynta ha kane ka jingpynkut ïa ka Shad Suk mynsiem ki kynthup ïa u Bah Robin Kurbah, President ka Seng Khihlang; u Bah Sukdor Kharakor, Assistant Secretary ka Seng Khasi Kmie; u Bah Shembok Nongkhlaw, President ka Seng Khasi Ri Bhoi Pyllun; bad u Bah L. Sungoh, President ka Seng Khasi Umtrew lem bad kiwei kiwei ki nongïalam ka Seng Khasi.
Kumba la kren da kitei ki nongïalam Seng Khasi, ka jingthmu kane kane ka shad suk mynsiem ka long ban pynpaw ïa ka jingsngewnguh ïa u Blei halor ki jingkyrkhu kiba u la theh kyrhai ha ka jingim ba man la ka sngi. Ha kane ka shad suk mynsiem ki la pyndonkam ruh da ki ksing bad ki tang muri ryngkat ki riam tynrai kaba long shi bynta ban pynphuh ïa kane ka shad Suk Mynsiem.
Haba khein kyllum ïa ka jingkren kitei ki heh nongïalam Seng Khasi, kane ka Shad Suk Mynsiem kam dei satia tang ba ki ïa lehkmen ban ai ka nguh ka dem ïa Blei halor shibun ki jingkyrkhu, kiba la theh ha ka jingim u khun Khasi khara, hynrei ka long ruh ban dang pynjanai bad ban pynneh pynsah ïa ka niam tynrai kumba la ïalam da ki longshuwa ki manshuwa.
