Kiew ka jingshalan ïa ki mar rep jong ka India: Ki jingpynkit kiba nyngkong eh kiba la thaw histori
New Delhi Rymphang 21: Hapoh ka jingïalam jong u Myntri Rangbah duh Narendra Modi, ka jingshalan ïa ki mar rep jong ka India ka la sakhi ïa ka jingkiew ka bym pat ju jia mynno, ha kaba bun ki mar ki poi sha ïew shabar ri ha ka sien ba nyngkong. Kane ka jingkiew ba kongsan kam dei tang shaphang ka khaiñ pateng – kadei shaphang ka jingpynkupbor ïa ki nongrep, ka jingkyntiew ïa ki lad kamai kajih ha ki jaka nongkyndong, bad ka jingbuh ïa ka pateng ba riewspah jong ka India ha ka rep ka riang ha ka map jong ka pyrthei.
Naduh ki soh haduh ki jingbam tynrai, kine ki jingpynkit ba nyngkong eh ki pyni kumno ka thong Aatmanirbhar Bharat jong ka sorkar Modi ka plie ki lad ba thymmai ïa ki nongrep jong ka ri.
Harum ki long katto katne ki jingshalan ba nyngkong ïa ki mar rep hapoh ka sorkar:
Ki jingkit ba nyngkong da ka lieng ïa ki soh Pomegranate jong ka ri sha Australia
Ha u mawmer ba kongsan na ka bynta ka jingshalan ïa ki mar rep jong ka ri, ka India ka la pynkit nyngkong eh ïa ki Sangola bad Bhagwa pomegranate sha Australia lyngba ka duriaw. Kane ka kam ka la kyntiew ïa ka jingpoi ki soh jong ka India sha ki ïew ha Australia, kaba la prat lynti shuh shuh ïa kiwei kiwei ki mar jong ka India ban rung sha ki ïew ka pyrthei.
La shalan ïa ki umsoh Fig ha ka sien ba nyngkong sha Poland
Ki soh Purandar fig ba kyrpang jong ka India ba la ïoh GI-tag mynta ki pawnam bha ha Europe. Ha u snem 2024, ka sorkar Modi ka la ïarap ban shalan ïa ka umsoh ba nyngkong jong ka India, ba shna na ki soh Purandar fig sha Poland. Ha u 2022, ka jingshalan ka long sha Germany ruh. Ki soh Purandar fig ki pawnam bha namar ka jingbang bad ka jingbha jong ki. Kane ka kam ka long ka jingjop ba kongsan ban kyntiew ïa ki mar rep ba kyrpang jong ka India ha ka rynsan kylleng ka pyrthei.
La shalan ïa u soh Dragon ha ka sien ba nyngkong sha London, Bahrain
Kum shi bynta ka jingkyntiew ka India ban pynïar ïa ka jingshalan jong ka ïa ki soh, u soh dragon uba don kyrhai ka fiber bad mineral, ba la tip ruh kum ‘Kamalam’ ha ka thaiñ, la shalan sha London bad Bahrain ha u snem 2021. Ki soh ba la shalan sha London kidei kiba shim na ki nongrep jong ka thaiñ Kutch ha Gujarat, katba ki soh ba shalan sha Bahrain kidei kiba la shim na ki nongrep jong ka West Midnapore (West Bengal).
Ka jingkit ba nyngkong kum ka jingpyrshang ïa ki soh Pomegranate sha US
Ha u 2023, ka India ka la shim ïa ka sienjam ba heh ban pynïar ïa ka jingdon jong ha ki ïew ha America da kaba shalan ha ka sien ba nyngkong kum ka jingpyrshang ïa ki soh pomegranate lyngba ka liengsuiñ sha USA. U soh Bhagwa’ pomegranate na Maharashtra u dei uba don lad bha ban shalan bad jan 50 per cent ka jingshalan ïa u soh na ka ri ka dei na Solapur distrik jong ka jylla.
La shalan ïa u ‘Leteku’ na Assam sha Dubai
Ha ka jingkyntiew ïa ka thaiñ shatei lammihngi, ha u snem 2021, ka jingkit ba nyngkong eh ïa ki soh grape Burmese, ba ju tip kum ‘leteku’ ha ka ktien Assamese, la phah na Guwahati sha Dubai lyngba Delhi. Kane ka jingshalan ka la wanrah ïa ki mar bam jong ka Assam sha kylleng ka pyrthei, kaba pyni ïa ki lad ba don ha ki jylla ka thaiñ shatei lammihngi jong ka ri ha ka khaiï pateng bad kiwei kiwei ki ri.
U sohphan na Tripura sha Germany
Ka Germany ka la ïoh mad ïa u sohphan jong ka India na Tripura ha u snem 2021. Ha ka sien ba nyngkong, la shalan ïa ki sohphan na Tipura sha Germany lyngba ka liengsuiñ. Ka jingkit ba nyngkong ka long shi metric ton ki sohphan ba la kaweh lama na Agartala. Kane ka pyni ïa ki sienjam jong ka sorkar Modi ba la pyntrei ban wanrah ïa ki jylla ka thaiñ shatei lammihngi hapoh ki kam shalan mar bam jong ka India.
U sohmynken ‘Raja’ na Nagaland sha London ha ka sien ba nyngkong
Ha u snem 2021, ha ka jingkyntiew ïa ka jingshalan ïa ki mar GI na ka thaiñ shatei lammihngi, la shalan ïa u sohmynken Raja na Nagaland sha London lyngba Guwahati da ka liengsuiñ ha ka sien ba nyngkong. Namar ka jingkloi ban pyut, ka jingshalan ka long kaba kham jynjar, hynrei ka India ka la plie lad ïa ka jingpynkit da ki liengsuiñ kaba pyni ïa ka bor jong ka India ban pynkit ïa ki mar rep ba kyrpang.
Ka jingshalan ba nyngkong ïa u khaw saw na Assam sha USA
Ha u 2021, ha ka jingkyntiew ïa ka jingshalan khaw jong ka India, ka la don ka jingpynkit ba nyngkong ïa u khaw saw sha USA. U khaw saw uba bun kyrhai ka iron udei u ba ju rep ha them Brahmaputra jong ka jylla Assam, khlem ka jingpyndonkam dawai. Ïa u khaw la tip kum ‘Bao-dhaan’, uba long shi bynta ka jingbam jong ki Assamese.
Ka jingpynkit ba nyngkong ïa u sohtrun Vazhakulam na Kerala sha Dubai & Sharjah
Ha u 2022, ka India ka la kaweh lama ïa ka jingkit ba nyngkong ïa u “sohtrun Vazhakulam” ba la ïoh GI tag na Vazhakulam, Ernakulam, Kerala sha Dubai & Sharjah, UAE. Lyngba kane ki nongrep sohtrun kin ïoh ka kamai kajih kaba kham biang bad kyntiew shuh shuh ïa ki mar rep jong ki ha ki ïew kylleng ka pyrthei.