Kiba phiel ki lah ban ïakhun biang ïa ka eksamin ha u Ïaïong-Jymmang: Rakkam Sangma

Shillong, Ïaiong 06: Da kaba ai khublei ïa baroh ki samla pule kiba pass ha kane ka eksam Secondary School Leaving Certificate, u Myntri ka tnad Pule Puthi ka jylla, u Rakkam Sangma ha ka sngi Saitjain u la pyntip ba ka Meghalaya Board of School Education (MBOSE) kan pynlong biang ïa ka eksam kaba tip kum ka supplementary examination ha ka taiew ba khatduh u Ïaiong lane ha ka taiew ba nyngkong jongu Jymmang.
U la pyntip ruh ba ka sorkar kan sa pynmih ïa ka academic calendar hapoh ka taiew ban wan, ban pynthikna ba kan don ka por kaba ïaryngkat na ka bynta ban pdiang ïa ki samla pule da baroh ki jaka pule.
Haba kren bad ki lad pathai khubor, u Sangma u la ong ruh ba ka result SSLC mynta u snem ka long kum ka jingpynkhein ïa ka rekod.
“Kadei ka sngi kaban sah jingkynmaw ïa ka jylla naba ka jingdon kiba pass mynta u snem ka long 87.10 persen. Ka long shisha kumba pynkhein ïa ka rekod,” u la ong haba ai khublei artad ïa ki 85 ngut ki samla kiba wan hakhmat duh. U la ai khublei ruh ïa kiwei ki samla kiba la pass ha kane ka eksam bad ong ba kane ka jingpass jong ki ka pynsngewkmen ïa ki kmie ki kpa bad ruh ïa ki jaka pule jong ki.
Lah ban kdew hangne ba ki don haduh 55473 ngut ki samla kiba pass na ki 63682 ngut ki samla kiba ïakhun ïa kane ka eksam kaba mut ba ki don kumba 8209 ngut ki samla kiba shah bat noh ha kane ka snem.
Na ka liang u Myntri haba kyntu ïa ki samla ba kim dei ban duh mynsiem, u la ong ba ki dei ban shim bad don ïa ka mynsiem ïakhun namar ka supplementary examination kan sa long ha ka taiew ba khatduh jong u Ïaiong lane ha u Jymmang ïa kaba ka tarik yn sa lah ban pynbna shen da ka MBOSE.
Ha kajuh ka por u Myntri ula ong ba ka sorkar kan sa pynmih ruh ïa ka Order kaban long ryntih lang na ka bynta ban khot pdiang klas ïa ki samla pule bad ïa kane u ong ba kin sa pyllait noh ïa kane ka jingpyntip ha ka sngi Nyngkong ban wan.
“Shen ngin sa pyllait noh ïa ka academic calendar la kumno kumno ha ka taiew ban wan,” u la ong.
Haba kylli halor kane ka result, u Myntri ula ong ba ki don bun ki sienjam ba ka sorkar ka shim kiba kynthup naduh ka jingpynkylla noh ïa ki kot pule da kaba wanrah noh da ki kot NCERT da kaba ïaid biang biang kumba long ka CBSE.
U la ai khublei ruh ïa u Myntri Rangbah ka jylla da kaba ong ba ka CM Impact kadei ka prokram kaba rit tangba ka long kum i jingshai ïa ki samla kumno ban thoh ïa ka eksam, ban pynkhreh katkum ki lynnong bad ruh ban tip kiba kum kiei ki jingkylli kiban wan.