Kyntait bun ki College ka jylla ban pynïasoh bad ka Capt. Williamson Sangma State University

Shillong, Iaiong 06: Ba bun na ki college ha ka jylla la kynnoh ba ki la kyntait ban pynïasoh bad ka Captain Williamson Sangma State University.
Katkum ki tyllong khubor na ka tnat pule puthi la ïathuh ba ki samla pule kiba kwah ban leit rung klas ha kum kine ki college kin hap ban ïakhun ruh ïa ka Common University Entrance Test (CUET).
Kumba ka long mynta ka Meghalaya ka don palat 70 ki college bad tang 17 tylli ki college kiba la phah ïa ki application bad kiba la ïasoh bad ka state university, ïathuh ka tyllong khubor.
“Laitnoh kine ki 17 tylli ki college, katba baroh ki hap ban ïakhun ïa ka CUET examination.”
Ha kaba ïadei bad kane na ka liang ka sorkar ka la buh ïa ki centre ba thymmai na ka bynta ki eksam UG CUET da kaba pyrkhat ruh ba kin don bun ki samla pule kiba hap ban ïakhun ïa kane ka eksam.
Haba kylli halor kane, uwei na ki heh ophisar bym kwah pynpaw kyrteng u la ong, “Kiba bun ki college kim kwah ban pynïasoh naba ki sngew artatien bad ki kwah shwa ban ïohi ïa ki jingtreikam jong ka.”
Shuh shuh la ong ruh ba na ka liang ka tnat ka la thoh sha ka sorkar na ka bynta ban pynïoh ka jaka na ka bynta ka Shillong campus jong ka Captain Williamson Sangma State University.
La ong ba kane ka state university shipor kan pyntrei ïa ki kam jong ka na Bijini Complex kaba ha Laitumkhrah.