Shillong Naitung 11: U Symbud CEM ka KHADC u Bah P N Syiem haba jubab ïa ka motion ka Khasi Tribe ha ka jingïadei bad ka Khasi Social Custom of Lineage Act (KSCLA), 1997 ba la wanrah da u MDC ka Sohra u Bah T W Chyne u la ong ba haba ai Khasi Tribe dei ban don ka kyndon ne sub section kaba shai bad lada ym ai ruh dei ban shai katkum ki kyndon naba ioh ka don ka jingktah hadien habud.
Halor kane u la ong ba kane ka Aiñ ka mih na kaei kaei kaba la leh naduh hyndai dei ban thep ha ka aiñ ne ban codify.
“Ym lah ban ai Khasi Tribe ïa kiba artatien ne kiba ai jait kpa ne kpa dkhar bad kane ka kdew ha ka kyndon 6 jong ka KSCLA bad ka section 7 ka kren shai ba uno ne kano ki bym bud ïa ka riti dustur ai jait kmie kim dei shuh ki Khasi kin ym ïoh Khasi Tribe bad Schedule Tribe. Ka Presidential Notification 1950 u Khasi u dei u Schedule Tribe hynrei lada um bud ïa ki riti dustur kaba long ruh katkum ka Act 1997 um dei shuh u Khasi,” ong u Symbud CEM u Bah P N Syiem uba khmih ruh ïa ka tnat Elaka ha ka EC KHADC.
Ha kaba ïadei bad ka jingpynduh noh ïa ka notification ba la pynmih da u Principal Secretary ka tnat Social Welfare kaba ailad ïa ki Deputy Commissioner ne SDO ban ai ST Certificate bad hadien ba la pynmih thymmai pat kaba ong ba khlem ka jingïoh tribe certificate napoh ka KHADC kin ym lah ban ïoh ïa ka ST bad halor kane na ka liang ka KHADC ka la shong jingïalang biang bad ka sorkar kan pynbeit thymmai ïa kane ka jingpynbna bad shen ynsa pynbna thymmai ïa ka, haba ka KHADC ka la ai jingmut ba lada kidei hi ki Khasi kiba dang ai jait kmie ym donkam ban wan wad Khasi Tribe na KHADC laitnoh ki bym bud ne kiba ai jait kpa ne kpa Dkhar.
Shuh shuh ha kaba ïadei pat bad ka jingdonkam ban ïasyllok ïa ki dorbar kur u EM Elaka u la ong ba shen ka tnat kan sa khot biang ïa baroh ki Dorbar Kur bad ban ïasyllok sani halor kane ka kam pynkhlaiñ ïa ki namar donkam ïa ki dorbar kur ban long bniah khnang ban ym mih uno uno u ba kam Rangbah kur u ba ai NOC kulmar.
“Ka Council kan bishar bniah ruh halor ka kam shongsang na ka jingai jait klumar,” u la ong.
U la ïathuh ba ka section 13 ka ong ba u Deputy Commissioner um lah ban ai ST Certificate khlem ka Khasi Tribe bad ym lah ban ai Khasi Tribe khlem ka Clan certificate bad ïa ka Khasi Tribe la lah ban ai naduh ka rta kaba dang 4 snem.
“Lyngba ka Lineage Act 1997 ka section 12 ka batai ba ym lah ban pynkylla jait da ka Affidavit khlem da ïoh ka jingmynjur na ka Council bad dei na kane ka daw ki deputy commissioner ki la pyrkhing bha ïa ka jingai ST Certificate bad watla katta ruh ka Council kan phah biang ïa kane ka jingpynkynmaw sha baroh ki tnat Sorkar,” ong u Symbud CEM ka KHADC.
