Balei tang ïa ka Majai, pan lut ki kot jong ki mynder na baroh ki Hima: HNLC

Shillong, Naitung 11: Ka Seng HNLC ka la ong balei ba u CEM ka KHADC, u Bah Pyniaid Sing Syiem, u pan ïa ki kot ki sla jong ki mynder tang jong ka Raid Majai, katba ïa ka Ichamati kaba don bun bha ki mynder pat um pan.
“Kane ka jingpan tang na Majai, kadei ka Political Blackmail jong u CEM ïa u Syiem ka Hima Sohra”, la ong u Bah Saiñkupar Nongtraw, General Secretary ka HNLC uba long ruh u Publicity Secretary, ha ka kyrwoh ba u la phah lyngba ka email mynta ka sngi.
Ka Seng ka la ong ruh ba u CEM udei ban pan lut ïa ki kot ki sla jong ki mynder ym tang na ka Hima Sohra, hynrei dei ban pan lut na baroh ki Hima kiba don ha Ri Khasi.
Kane ka thma ktien hapdeng ka HNLC bad u CEM ka KHADC, ka la ïaid mynta la lai sngi, ha kaba hynnin ka sngi ha kaba sdang jong ka dorbar lyiur, u Bah Pynïaid, haba pynshai halor ka jingpynbna biang ïa ka Majai kum ka Raid, u la buh ka jingkylli kham ieit jaidbynriew ma u, uba la ïada ïa ka Majai na ki mynder ne kham ieit jaidbynriew ka HNLC.
Shuh shuh ha kane ka kyrwoh, ka HNLC ka la ong hato ka jingpynbna Raid ïa ka Majai, kaba long ka kad khaïi mawshun sha Bangladesh, kan ktah kumno ïa ki mynder. “Hato baroh ki mynder kin phet noh na Majai hadien ba la pynbna ïa ka kum ka Raid?”, la ong u nongïalam ka HNLC, da kaba kynnoh ruh ba ha ka sngi ba ka KHADC ka pynbna ïa ka Majai kum ka Raid, ki mynder ki la ïalehkmen da kaba thang bom pataka.
U Bah Nongtraw shuh shuh u la kynnoh haba u Syiem u la kyntait ban ai ïa ka bhah kaba bun sha u CEM, ka la mih ka ishu ban shu thong da ka tyngka ïa u Syiem ka Hima Sohra.
“U Bah Pynïaid u pyndonkam da u Manager lajong bad katto katne ki nonglum pisa ban pyndonkam ïa ka iktiar jong u kum u CEM. U lum pisa hi dade na kiba bun ki tyllong. Nga tharai wat u Bah Pynshngaiñ Syiem, uba dei u Deputy CEM, u tip bha ïa kane katba ki dkhot jong ka Executive Council (EC) kim don jingtip eiei. Ïa mynta, ka Majai ka long kum ka pdeng jong ka khaii ka pateng ha East Khasi Hills bad ka sohpdung jong ki riewsaiñpyrthei nongkam bymman ban leh bor. Ka jingkylli ïa u CEM shaphang mano ba kham ieid jaidbynriew, ma u lane kiwei pat, ka dei kaba mat kaba kham kongsan,” la kynnoh u Bah Nongtraw.
U Bah Pynïaid Syiem u dei tang u khynnah rit Johnny uba dang shen u la mih na ka syrngiew jong ka karkhana dieng u kpa u bym don jingtip eiei shaphang ka saiñpyrthei, u la ong.
Da kaba pynpaw ba ka HNLC ka la ïakhun ban pynïoh jinglaitluid ïa ki paid jong ka ri Hynñiewtrep da ki phew snem u Bah Nongtraw u la ong, “phi long thik kum u Captain William A Sangma bad ka Indira Gandhi, kiba dang shem ïa ka Meghalaya hynin ka sngi.”
“Ïa ka jingmut ‘ieid Jaidbynriew’ la pyndonkam bakla haduh katta katta kumba la pyndonkam bakla ïa ka aiñ da ki politishian bamsap. Ka jaidbynriew jong ngi ka la mad ïa ka jingshah leh bym hok ha ki kti jong ka Sorkar Jylla bad ka Sorkar Pdeng,” la kynnoh shuh shuh u Bah Nongtraw.