Man la ki sorkar jylla ba wan shimti ïa ka jingsynshar ki la buh beit ïa la ki thong treikam jongki ban kyntiew ïa ka jylla hynrei hato kane ka long kumba ki buh thong ne sah tang ha ki kot ki sla ne tang ha ki rai namar haduh mynta ka Meghalaya kam pat long satïa kata ka Jylla kaba kiew irat hynrei kaba dang sahdien nadong shadong kat shaba phai. Isammut bad ilehraiñ hi khait ban shu ïohi tang ha ki kot khubor ïa ki jingkren ‘byrthen kum u laren’ jong ka Sorkar Jylla kaba la shu lapmiet tang ka “Buhthong” ha ki kam pynroi bapher bapher ba kin pyntrei ne pynphyrnai ïa ka Jylla ha baroh ki lïang.
Ka jingbuhthong (Target) ïa ki skhim pynroi bapher bapher ne ïa ka jingtreikam ka Sorkar Jylla, ka dei ka mat kaba kongsan tam ha ka synshar khadar bad ka dei ka lynti kaba pynjanai ïa ka jing treikam ki shakri sorkar (Work Culture), kiba ju treikam jaipdeh bad shong kyllaiñ myngngor ha ki Ophis ne ki shuki treikam ne kiba shu ïalapmiet ha ki khana lorni. Ka Meghalaya haduh mynta ka dei ka Jylla kaba shu heh tang ka ‘ktien’ bad ka bym ju kynjoh satïa ïa ki thong ba ka buh. Ki nïa ka Sorkar ki long thik khlem ïapher shuh na u briew uba shu ‘Tharai’ bad ‘Buhteng’.
Ka jingsahdien jong ka Jylla ynhap ban kynnoh beit ïa ki Khlieh Nongsynshar kiba bat ïa u shabuk bad kiba tyngkai ban sympat ïa ki shakri lehroh ne lehmon bad dei kane ka jinglong jingman ki shakri sorkar hangne kiba long ka dawbah ba ka Jylla kan ïai sahdien haduh kine ki sngi.
Ka Sorkar Kmie ka don kyrhai ki skhim, ki flagship programme, ki mission ba ka la wanrah ban pynroi ïa ki Jylla la ka long ha ka koit ka khïah, ka pule ka puthi, ki surok ne ki lynti syngkieñ ne kiwei bad ka ju buh ruh da ka ‘Thong’ ha ka jingpyntreikam ïa ki hynrei aiu ki jïa? Hato kine ki thong ki ju kynjoh mo sha ka thong ba la buh? Ka Meghalaya ka dei kawei ka Jylla kaba la pyndkoh ïa ka jingthmu jong ka Sorkar Kmie bad ïa kane ka jingshisha la sakhi na kiba bun ki flagship programme, ki mission bad ki project bapher bapher kiba la shu buh tang u mawbynna.
Lada phai sha ka surok bad ki lynti syngkieñ, ka Sorkar Kmie ka la pyntreikam ïa ka skhim PMGSY ban pynpoi surok sha baroh ki shnong bym pat ïohi surok ha ka Ri baroh kawei. Kane ka skhim ka la treikam ha kine ki hajar snem ba thymmai bad kat kum ki kaidphod ka Sorkar Kmie la sakhi ba ka Meghalaya ka la sahdien tam na baroh ki Jylla ka Ri. Kiba bun ki Jylla ki la ïaid shakhmat hynrei ka Jylla Meghalaya ka dang sahdien bha ym tip hangno kala sahkut bad hangno kala poi namar haba peit ïa kiba bun ki skhim PMGSY la shu ïohi ba sah lyngkrang bad ki bym poi shano shano ruh . Ïano yn kynnoh bad dei ruh ban buh jingkylli ba kaei sha ba pynlong ïa ka Meghalaya ban sah shatrai na ka thup pyntreikam ïa ki kam pynroi?
Ha ka koid ka khïah, ka Meghalaya ka dang sahdien ha baroh ki lïang naduh ka jingdon ki doktor ne haduh ki jaka sumar. Baroh ki don ha ka jingdkoh suda kat shaba phai. Ka jingwan ka skhim National Rural Health Mission (NRHM) ka la ai shi bun ki jingkyrmen namar wat ïa ka jingduna Doktor, kane ka skhim ka la ailad ban shu ïasoi contract bad ki doktor kam pher ki dei nangno nangno ruh ne wat haduh ban pynbha bad pynjanai ïa ki jaka sumar naduh ki Hospital haduh ki Dispensary. Hynrei hangne ha Meghalaya kane ka skhim ka la trei shaid shaid tang ha ki kot ki sla ne ki jingthoh katba lada peit pat sha ki jaka sumar, kim ïapher satïa bad ki por shuwa ban wan kane ka skhim. Ki la mih shibun ki jingpyndonkam bakla ïa kane ka skhim ïa kaba ka sorkar ka dei ban khmih bnïah bad ban leh eiei noh shuwa ba kan thohbrïa sa ha kane ka skhim kumba long ka PMGSY.
Ka sorkar ka la buh thong ban kyntiew ïa ka pule ka dangle bad ka koit ka khïah hapoh ka Jylla hadien ka la kyndit bynriew da ka jingsakhi ba bun ki Samla ka Jylla bad ki longiing longsem, kim banse ban mih napoh ka Jylla ban leit wad jingstad bad ruh ban leit sumar sukher sha ki Hospital bapawnam ha kylleng ka Ri. Kane ka jingmih ki samla ban wad jingstad bad ki longiing ki ban leit wad jingsumar kam dei shuh ka kam kaba thymmai hynrei kaba la jïa naduh ba ioh ïa ka Jylla la ka jong. Ki Sorkar Jylla kiba la leit noh ruh, ki la ïohi bad sakhi ïa kane bad ki la pynpaw ïa ki juh ki jingbabe bad jingsngew ba dei ban kyntiew noh ïa ki hapoh ka Jylla. Hato ki poi sha ki nala ne sha khap? Ha ka pule puthi, ka Meghalaya ka dei ka Jylla kaba sha trai ha ka jingdon jong ki paid nongshong shnong ba la nang la stad katkum ka khana samari jong ka Sorkar Kmie. Kane ka jinghïar ka dei namar ka jingbun palat ki jingpep skul shiteng por bad ki jingbym lah kyrshan na iing na sem ban pynwad jingstad ïa ki Khun. Ka Sorkar Meghalaya ka ïohi mo ïa ki daw tynrai, hynrei “EM” kan dei ka jubab, namar kam pat ju pynshongnïa ne leh ïa kaba donkam. Ka Jylla ka long kumne kumba ka long mynta ha ka pule ka dangle ka dei baroh ka daw ba ki Skul ne jaka pule ki la long tang ki pajwa khaii (Bussiness) ban kamai spah ym shuh ki shlem ka jingnang jingstad. Ka jingrem ki bai skul, ka jingleh bussiness ha ki kot ki sla, ki Uniform skul naduh i muja kjat haduh ha ki ribon sniuh ka dei ka daw bala buh ïabun ki longiing ban ïatyngkhuh jingeh ban kyrshan ïa ki khun ki kti bad wanrah ïa ka jingpep skul shiteng por.
Ka Sorkar ka la dei ban kyndit bynriew mynta bad kumba la ong ba kam dei shuh ban shu tyngkai ïa u shabuk ban sympat ne pynsajïa ïa ki shakri sorkar kiba lehmon ne shu im sngi ha ki Khana Lorni ha ki Ophis treikam jong ki. Ka ladei ka por ban wanrah noh ïa ka Work Culture kaba pyrrkhing bha haduh katta lada ka thmu shisha ban kynjoh ïa ka thong ba ka la buh. Ka Sorkar ka don ka hok ban sympat shabuk ïa la ki shakri namar ka khlem lehbeiñ satïa ïa ki namar ka la siew da ka dor kaba pahuh pahai kumba ki la dawa khlem da bam-ei wat shi naïa ruh.
