Ban jied ïa ki khynnah kiba tbit ha ka jingñiah cycle

Mawkyrwat, Risaw 24: Kum shibynta ban ïoh ban jied ïa ki nongñiah cycle kiba tbit, na ka liang ka Meghalaya Cycling Association (MCA) ryngkat ka jingïatreilang bad ka Mawkyrwat District Cycling Association (MDCA) mynta ka sngi ki la pynlong ïa ka Meghalaya State Cycling Selection Trials (MSCST) 2023 ha Mawkyrwat, South West Khasi Hills District.
Ka jingthmu jong kane ka lympung ñiah cycle ka long ban ïoh ban jied ïa ki khynnah bad ki samla shynrang bad kynthei kiba tbit ba kin mihkhmat ym tang ïa ka hapoh ka Jylla Meghalaya ne ïa ka Ri India wat haduh ka lympung ïalehkai jong ka Olympic ruh bad ka long ruh ha kajuh ka por kum shibynta ban jied ïa ki, ba kin ïoh ïashimbynta ha ka National 28th Mountain Bike (MTB) Championship ka ban sa long shen.
Ha kane ka sngi la pynlong ïa ki jingïalehkai kiba kynthup ïa ka XCO Youth, XCO Junior bad XCO Elite bad XCO Women Open Category bad Down Hills Open ha kaba ki nongïashimbynta ki don baroh 61 ngut na kylleng jong ka Meghalaya.
Ki nongjop ha kane ka sngi ki long ha ka XCO Junior ba wan nyngkong u Lambormi Phawa, ba ar u Laraikut Sana bad ba lai u Dalenmi Sana kine ki dei na ka West Jaiñtia Hills Adventures Cycling Association (WJACA). Ha ka XCO Women ka Phyrnai Kyndait na ka West Jaiñtia Hills Adventures Cycling Association (WJACA) ba wan nyngkong, ba ar ka Lawankotdor Swer na East Khasi Hills District bad ba lai ka Hakarupaia Dkhar na ka West Jaiñtia Hills Adventures Cycling Association (WJACA).
Nangta, ha ka XCO Youth ki long u Kevin Lyngdoh na ka Mawkyrwat District Cycling Association (MDCA) ba wan nyngkong, u Fabian Khyllait na Eastern West Khasi Hills District ba wan ba ar bad u Jingshaibor Thongni na ka Mawkyrwat District Cycling Association (MDCA)u wan ba lai, ha ka XCO Elite Men ki long u Middlestar N. Marak ha ka kyrdan ba nyngkong, u Alvindarison Wanniang ha kaba ar kine ki dei na ka Mawkyrwat District Cycling Association (MDCA) bad u Iallamjingshai Mylliem na ka East Khasi Hills District ha ka kyrdan ba lai.
Ki nongjop ha ka Downhill Open Category, ki long ïa ka nam jop la rah da u Aaronson Oniel Kharpuri, ba ar u Pynshngaiñborlang Lyngkhoi kiba dei na East Khasi Hills District bad ba lai u Willbornson Wahlang na ka Mawkyrwat District Cycling Association (MDCA).
Kiba ïadonlang ha kane ka sngi ki long u bah Lening Bareh, President ka Meghalaya Cycling Association, u bah Ian Kupar Diengdoh u dkhot jong ka MCA, u bah Ambrose Thongni, President ka Mawkyrwat Cycling Association lem bad kiwei de kynthep ïa ki nongwan peit kai, ki nongïashim bynta naduh ki hep rit, ki samla shynrang bad kynthei ryngkat ki nongkitkam jong ka Meghalaya Cycling Association (MCA) bad ka Mawkyrwat District Cycling Association (MDCA).