Ki shlem hikai phutbol ïa ki heprit ki la saiñdur ban ïoh leit pat sha ki Academy bad Club kiba heh: Banteidor

Shillong, Ïaïong 20 : U Bah Banteidor Lyngdoh, MLA ka Mawkynrew bad Myntri barim ka tnad Sports, u la ong ba ka jingdon ki shlem ai jinghikai phutbol ïa ki khynnah rit shynrang bad kynthei kiba hapoh 12 snem lane ki Football Grassroot Centre ha ka thaiñ ki la long ka jingïarap kaba khraw ïa ki heprit ban ïoh leit shah hikai bad mih khmat sha ki Academy bad ki Club kiba heh ym tang ha ka Jylla hynrei sha kiwei pat ki jylla ka Ri India.
Ïa kane u Bah Banteidor u la pynsngew ha ka jingleit jong u ban ïadon bynta ha ka prokram ïalehkai phutbol kaba la long ha shnong Thadan kaba dei jong ka Mawber Football Grassroot Centre dang shen.
U la pynpaw ba ka jingïatreilang ban pynrung ïa ki khynnah na ka shnong Wahlakhiat bad Mawlat sha ka lympung Baby League sha madan Polo ka la pynlong ïa u heprit Banpliebok Khongjoh ban shah jied ban ïoh jinghikai shuh shuh ha ka kam ïalehkai phutbol kata sha Hyderabad hapoh jong ka Baichung Bhutia Football Academy.
Da kaba pynpaw ba ki khynnah ïalehkai na ki Centre bapher ki la kiew sha khmat, u la ong ba ki dei ban long kiba skhem jingmut ban poi sha ka thong bad ba kim dei ban pynlehnohei ïa ka sap kaba ki don. U la ai khublei ïa ki kmie ki kpa, ki nonghikai phutbol kiba shim ïa ka jingïatreilang ban saiñdur ïa ki khynnah.