Shah jied u Bah Torak Kharpran kum u coach ka kynhun ïalehkai boxing ka ri India

Shillong, Ïaïong 20 : U Bah Torak Kharpran uba dei uwei na ki Boxing Coach jong ka Sports Authority of India (SAI), ula shah jied ban long kum uwei na ki coach bad manager ka kynhun ki rang ïakura ka ri, kiban leit ban ïashim bynta ha kawei ka rynsan ïakura kaba la tip ïa ka kum ka IBA Elite Men World Boxing Championships 2023. Kane ka rynsan ïakura kan long ka Nongbah Tashken, Uzbekistan kaban sdang naduh ka 29 tarik mynta u bnai Ïaïong bad kan kut ha ka 15 tarik u Jymmang 2023.
Kumba ka long ïamynta, u Bah Torak u la don bynta bad kane ka kynhun ki rang ïakura ka ri kiba don hapdeng ka jingpynkhreh ban leit ban aireng sha katei ka rynsan ïakhun, ka prokram ïakilan ïa ki rang ïakura kaba la sdang ïa ka naduh ka 14 tarik bad kut ha ka 23 tarik mynta u bnai. Ha kane ka kynti kaba mynta, ka India ka don ïa ka jingthmu ba kan sei madan bun ngut bha ki rang ïakura kata kumba 13 ngut eiei.
Hynrei ban ïoh ïa ki 13 ngut ki rang bad snar ïakura kiba kynsai, u Bah Torak lem bad kiwei pat ki coach ka India, mynta ki la lum lang ym duna ïa 30 ngut ki rang ïakura ba kynsai ka ri, ban ïadon bynta ha ka prokram ai jinghikai, kaba la ïaid shakhmat ha nongbah Tashkent, Uzbekitsan.