Shillong, Nohprah 19 : Ka jingtreikam ki Self Help Group (SHG) ka dei kawei ka lad ka lynti ban weng ïa ka jingduk jingkyrduh lyngba ka jingïarap mar kylliang hapdeng ki para dkhot, la ong u MLA ka Mawkynrew, u Bah Banteidor Lyngdoh haba kren kum u kongsan ha ka jingïalang plie paidbah ïa ka ophis treikam ka Tbeh Jingshai Village Organization (VO) II ha Jongksha myn ha ka 18 tarik u Nohprah, 2023.
Kane ka VO II ka kynthup ïa 11 tylli ki Self Help Group bad ki nongïalam kum ka jingsngew burom ïa la u MLA uba pynïoh ïa ki kane ka ophis treikam ki la khot ïa u ban plie paidbah ïa kane ka ophis treikam kaba la mang tyngka na ka Special Rural Work Programme (SRWP). U MLA ym tang ba u la ïarap ïa ka Tbeh Jingshai VO II hynrei u la dep ai jingïarap ban shna ïa ka ophis treikam jong ka Shlem Jingkyrmen Village Organisation (VO) I kaba dei lyngba ka SRWP.
Ha ka jingïalang plie ïa ka ophis treikam ka Tbeh Jingshai VO II, nalor u Bah Banteidor kum u kongsan, la ïa donlang ruh da u Bah Olet Kharsahnoh, Sordar ka shnong Jongksha, ki nongmihkhmat na ka Mawkynrew C&RD Block ba dei peit ïa ka NRLM, ki nongkitkam bad nongïalam na ki SHG bapher bapher, na ka Village Organisation nalor kiwei pat.
U MLA haba kren ha ka jingïalang, u la ong ba ka jingïatreilang bad ka jingïarap mar kylliang hi ka dei ka lynti ban ïa kyntiew ïa ka ïoh ka kot ha ka imlang sahlang. “Ki SHG ki dei ki kynhun kiba pyni ïa ka nuksa ban ïarap iwei ïa iwei pat bad lyngba kane ka jingïarap mar kylliang ban kyntiew iwei ïa iwei pat kan weng ïa ka jingduk jingkyrduh “, la ong u Bah Banteidor.
