Ki riew wad dong kim dei ban ñiew beiñ ïa ka jingnoh synñiang ki nongmihkhmat : Ampareen Lyngdoh

Shillong, Risaw 03 : Ka Myntri ka tnad ka Koit ka Khiah kaba dei ruh ka nongai ktien jong ka sorkar ha ka sngi Palei ka la kyntu ïa ki nongwad dong ba kim dei ban ñiew beiñ palat ïa ka jingnoh synñiang ki nongmihkhmat paidbah.
Kane ka jingkren jong ka Myntri kadei hadien ba la mih ka jingkynthoh kaba jur halor ka jingthung ïa ka MP barim ka Lok Sabha na Tura, ka Agatha K Sangma (kaba dei ruh ka para jong u Myntri Rangbah ka Jylla Conrad K Sagnma), kum ka Chairperson jong ka Meghalaya State Commission for Protection of Child Rights (MSCPCR).
“Kam dei ban long kumne bad kam ïahap hi ruh namar baroh ngi trei shitom ban don ha ka kyrdan kaba ngi don mynta,” ong ka Myntri kaba dei ruh ha kajuh ka por ka nongïalam jong ka NPP haba kren bad ki lad pathai khubor.
Da kaba kyntait ïa ka jingshah kynnoh ba ka jingthung ïa ka Agatha kum ka Chairperson kadei ka jingthung kam ïa kiba haiing la jong, na ka liang ka Myntri ka la ong, “Kaei kaba phi mut ban ong ba ka dei ka jingthungkam ïa ki bahaiing la jong? Hato ka jinglah treikam bha kam don jaka seh? Hato ka jingtbit treikam kam don jingkheiñ? Kaei shuh phi dang kwah? Ka (Agatha) ka dei kaba paka eh na bynta katei ka kam lada phi kylli ïanga shimet. Nga kren kum ka nongmihkhmat paidbah. Lada don ki nongmihkhmat kiba la don ka jingtbit kum ma ka kiba kloi ban bteng ïa ka kam shakri paidbah, kaei ka jingma? Hato donkam ban da kdew ba kadei ka para jongno lane kadei ka khun jongno?”
Ka Kong Ampareen ka la ong ruh kumno ki paidbah kim sngewthuh bad kim shaniah ba ma ki ruh ki don ka jingtbit bad ka jingstad. “Lashai lada don u khun jong uno uno u politishan lane ka para jong uwei pat phin ong bad kynnoh ba kadei ka jingthung kam namar ka jingïadei ba haiing. Haduh katno phin ïai bteng ïa kane ka rukom kynnoh? Kine ki dei ki briew kiba la don ka jingtbit. Tei kaei pat kaba phi kwah ïangi ban leh? Lada ngi wallam da ki briew ki bym pat tbit phi hi phin ong ba kim pat long,” ka la ong.
Ha kajuh ka por ka la ong ba kam pat ïoh ban kren ïa ka Agatha hadien ba ka lashimti ïa ka kam hynrei ka sngewthuh pat ïa ka jingsngew jong ka halor kine baroh. “Nga ruh nga dei ka khun jong u politishan kumta kamut phi pynrem ïanga ruh? Phi ong ba ngam pat leh ei ei kaba bha? Tangba, ngi ruh hap ban mih ban ïa khun ïa ka elekshon bad ngi hap ban jop ruh.”
Ha kajuh ka por ka ong ruh ba ki paidbah ki donkam ban peit ïa ki nongmihkhmat paidbah katkum ka jinglah jong ki.
“Nga kyntu ïa ki paidbah nong Meghalaya ba kim dei shuh ban long kumne. Ngi dei ki politishan hynrei hato phin shu pynrem beit ïangi man ka por? Hato phi la klet noh ïa ka jignnoh synniang jong ki politishan ïa ka jylla Meghalaya? Hato mangi baroh ki dei ki biej khlem kano kano ka kyrdan? Hato ngim dei kiba la biang ka kyrdan? Kumta sngewbha namar don u pud ïa kane ka mat ïatai ruh, thung kam bahaiing.”
Ka Kong Ampareen ka ong ruh ba ki politishan ki dei ki briew bad ki don ka thong ha ka jingim kaba dei ka jingshakri ïa ki paidbah bad ïa ka jylla. Kumta ka ong ba ki sngewsih ban ïohi ba ki paidbah ki ñiew beiñ palat bad kumta ka kwah ba kum kine kiei kiei kidei ban kut noh.
Ha kajuh ka por ka Kong Ampareen ka ong ruh ba halor ka ishu kaba ïadei bad ka Agatha, ki paidbah ki dei ban tip ba kadei ka MP kaba la jop lai sien bad kumta ka la dei hok ban ïoh ïa ka kam kum ka Chairperson jong ka State Commission for Protection of Child Rights.