Ki politishan mynta ki pyrkhat myntoi shimet suda – kynthah u Dr. Mukul ïa ka NPP ha Shella

Shillong, Nailar 11 : U Nongïalam ka Liang Pyrshah ha Iing Dorbar Thawaiñ ka Jylla, Dr. Mukul Sangma u la ong ba mynta ki politishan ki pyrkhat beit tang na ka bynta ka jingmyntoi shimet bad ki shu kwah beit ban don ha ka bor ym ban shakri ïa ki paidbah.
Ïa kane u Dr. Mukul u la kren ha ka jingïalang pynrung dkhot sha ka Trinamool Congress kaba long ha Shella constituency hynne ka sngi. “Ki party kiba don ha ka MDA ki khlem treh ban don ïa ka pre-poll alliance namar bun na ki paidbah ki kwah ban weng noh ïa katei ka alliance na ka bor synshar,” u la ong.
Nalorkata, u Dr. Mukul u la ong ruh ba kane ka bor synshar ba mynta ka la kular ba kan ïakhun na ka bynta ka hok jong ki paidbah ha shwa ka elekshon hynrei u buh jingkylli pat kaei kaba jia ïa kitei ki jingkular baroh hadien ka elekshon. “Ka Meghalaya Trinamool Congress dei tang maka kaba lah ban ïakhun pyrshah ïa kane ka rukom treikam,” u la bynrap biang.
Nalorkata, u ong ruh ba ha ka por ba ki synshar ma ki, ki la pyrshang ban kyntiew ïa ka Meghalaya kum ka jaka pdeng jong ka pule puthi bad ka jaka jngohkai pyrthei. Shuh shuh u ong ruh ba ha u 2011 na ki ar tylli ki college sorkar, ki la tei shuh sa hynriew tylli. Tangba u ong pat ba mynta ka pule puthi ka don ha ka kynrum kynram. U la kynnoh da kaba ong ba naduh ki nonghikai SSA, ki ASHA bad ki nongtrei MeECL kynthup ïa ki longkmie ba kamai marwei ki la mad bad kynduh jingeh ha kane ka sorkar.
Kumta, u la kam ba dei tang ka Meghalaya TMC kaba lah ban ïakhun bad kaba donka thong ban trei na ka bynta ka bit ka biang jong ki paidbah ka jylla.