Shillong, Naiwieng 06 : U heh nongïalam ka BJP ha Meghalaya ba dei ruh u Myntri ha ka sorkar jylla, Bah AL Hek ha ka sngi Balang u la ong ba ki party thymmai kum ka Voice of the People’s Party (VPP) ka dei ban pynïar ïa ka jingtreikam jongka ha baroh kawei ka jylla Meghalaya.
“Ka VPP kadei ka sengsaiñ pyrthei ha Meghalaya kumta ka lah ban leit baroh sawdong jong ka Meghalaya ban pynkhlaiñ ïa ka party. Ki don ïa ka hok,” ong u Bah AL Hek haba kren bad ki lad pathai khubor haba jubab halor ka jingkylli hadien ba ka VPP ka la pynpaw ïa ki dak ban leit pynïar tnad sha rilum Garo.
“Nga ïaroh lada ki leit kylleng kylleng. Ki dei beit ban ïakhun bad aireng ha baroh kawei ka jylla ym dei tang ha kawei ne ar tylli ki distrik. Ka VPP kadei ban long ka party jong ka Meghalaya,” u la bynrap biang.
Halor ka jingkylli, u Bah Hek u ong ba kam pher la kiwei ki ong kumno kumno ruh namar kane kam don ei ei bad ka BJP.
Tangba, utei u nongïalam ka BJP u ong ba ka party ka long kaba pynkhreh ban aireng ha ka elekshon MDC lada ka ïoh ïa ki kyrtong kiba biang. Haba pynshai halor ka jingshah kynnoh pyrshah khristan, u Bah Hek u la ong ba ïalade u dei u khristan bad u dei ruh u nongmihkhmat ka BJP kumta katei ka dei ka nuksa ba ym dei ban shu kynthoh. U ong ruh ba khatduh hi kadei ka rai jong u paidbah ïano ban jied ha ka por elekshon.
