Shillong, Naitung 9 : Ki Party baroh kiba don hapoh kane ka sorkar synrop lang Meghalaya Democratic Alliance (MDA) ki dei ban ïeng tylli lang ban pyrshah ïa ka Uniform Civil Code (UCC), ong u MLA ba rim ka Mawlai u bah P.T Sawkmie.
U la ong a ka sorkar BJP ka la thikna beit ban wanrah ïa kane ka Bill hapoh ka ïing dorbar thawaiñ Parliament jongka ri ha ka Dorbar ka ban long mynta u bnai bad kane ka aiñ kan ktah ïa ki paid nongshong shnong ka ri khamtam eh ïa ki rit paid.
U la ong ka jingthmu jong kane ka UCC ka long ban pyntreikam kajuh ka aiñ ïa baroh ki nong India bad kumta la dei ban pyrshah jur bad dawa ba dei ban pynkylla noh ïa kane ka aiñ. U la ong ruh ba ka UCC kan ym lah ban treikam hapoh ka Nagaland namar ka don ka Special Act ba la pass da ka Parliament ka Article 371 A kaba ïada ïa katei ka jylla bad ki paid Naga.
“ Ngi la don ha ka jingsyier kaei ka ban jia ïa ngi ka jaidbynriew rit paid bad hato kan ktah ne em ïaka Sixth Schedule, ka Land Transfer Act, ki riti ki dustur bad hato kan ym ktah ïa ki bor jong ki Balang Khristan bapher bapher” ong u bah Sawkmie.
“ Nalor kane u la ong ba wat ha ka jylla Manipur ruh ka don ka Article 371 C bad kumta kane ruh ka don ka Special Provision. Ka Mizoram ka don ka Article 371 G kaba dei ka special provision bad kaba mut ba ki Central Act kim treikam ha kitei ki jylla. Kaba sngew synei ka dei ïa ka jylla Megalaya namar ym don ki aiñ kiba khlaiñ ban ïada ïa ngi lait noh tang ka 6th Schedule kumta dei ban dawa jur ba kane ka aiñ kam dei ban treikam hapoh ka jylla kaba hap hapoh ka 6th Schedule bad dei ruh ban ïeng tylli bad pyrta da kawei ka sur ba ym kwah ïa ka aiñ UCC” pynkut u bah Sawkmie.
