Shillong, Naitung, 09: Ki Khlieh nongsynshar jong ka thaiñ Sohra bad Shella kiba don hapoh ka shatri jong ka Sohra District Demand Forum (SDDF) ki la pynkynmaw biang ïa u Myntri Rangbah jong ka Jylla u Conrad Kongkal Sangma ha kaba ïadei bad ka jingdawa ban phiah noh ïa ka East Khasi Hills District bad ban pynkha ïa ka distrik ba thymmai.
U Secretary jong ka Forum u Bah Banlam Lyngdoh ha u kyrwoh ba la phah sha ki lad pathai khubor u la pynpaw ïa ka jingsngewnguh bad ka jingsngewkmen kaba khraw eh ïa u Myntri Rangbah jong ka Jylla u u Conrad Kongkal Sangma uba ha ka 5 tarik, kyllalyngkot, 2023 u la kular ba shen yn phiah noh ïa ka East Khasi Hillls District kaba la heh than bad ka district kaba thymmai kan dei ka thaiñ Sohra bad kaba kongsan eh kaba u la pynshai ba ba ka Headquarter jong ka district bathymmai kan dei hi ka Sohra.
Ha ka jingïakren ha ka jingïalang jong ka Sohra District demand Forum kaba la long ha ka sngi Saitjaiñ, ki khlieh nongsynshar ki la kyntu ïa ka Forum ba kan buddien halor ka jingpynbna bad ka jingkular jong u Myntri Rangbah khnang ba yn dup lah ban plie noh shen ïa ka district katkum soskular kaba u Myntri Rangbah u la khlei ha ka jingleit iuhkjat jong u ha Circuit House, Sohra ha katei ka sngi.
Ki khlieh nongsynshar ki la pynpaw ruh ka jingsngewnguh ïa ka Sohra District Demand Forum kaba la trei shitom naduh u snem 2018 terter ban pynbiang lut ïa ki jingdonkam nadong shadong katkum ka jingkwah jong ka Sorkar Jylla.
Ha ka jingïalang, la don lang u Syiem jong ka Hima Sohra u Pa’iem Freeman Sing Syiem uba long ruh u Chairman jong ka Forum, u MLA ka Sohra Constituency u Bah Gavin Mylliem, u MLA ka Shella Constituency u Bah Balajied Synrem, u MDC ka Sohra u Bah Titostarwell Chyne bad ki ki Sordar, ki Rangbah Shnong jong ka thaiñ.
Kiba bun na kiba nongïashim bynta ha ka jingïalang ki la kyntu ïa ka Forum ba kan buddien thaid shi thaid halor ka jingpynbna bad ka jingkular jong u Myntri Rangabh bad ban thoh noh kham kloi sha ka Sorkar ha kaba ïadei bad kane ka kam.
Ki nongmihkhmat kiba don ha ka jingïalang ki la pynpaw ïa ka mynsiem kaba kloi ban ïatreilang bad ki khlieh nongsynshar lane ka Forum ban pynurlong noh ïa ka jingangnud jong ki paidbah ka thaiñ. Ki la kyntu ruh ba lada donkam ban nang pynbiang shuh shuh ïa ki jingduna khamtam ha kaba ïadei bad ka jingpynkohnguh ïa ki katto katne ki shnong ki bym pat shai bha ïa kane ka kam khnang ba yn ïoh ïa ka jingmynjur kaba long shi spah na ka shispah.
Ha kane ka jingïalang, la pyntip ruh ba ha ka 6 tarik, Jylliew, 2023 la pynthymmai ïa ki nongkitkam jong ka Sohra District Demand Forum (SDDF) ha kaba u Pa’iem Freeman Sing Syiem u la shah jied biang kum u Chairman bad u Bah Banlam Lyngdoh kum u Secretary, Bah Atiar Syiemlieh bad u Bah Alan West Kharkongor kum ki Adviser jong ka Forum nalor kiwei pat.
