Ki paidbah ki la pyrshah lypa ïa ka Casino, ka sorkar ka dei ban weng syndon ïa ka aiñ Khalai ha ka jylla : George B Lyngdoh
Nongpoh, Nailur 23 : U Bah George B Lyngdoh MLA ka Umroi ba dei ruh u Chief Whip ka liang pyrshah u ba la hiar khnang sha Khanapara hynin ka sngi naka bynta ban ai mynsiem ïaki kynhun sengbhalang kiba la ieng ban pyrshah ïaka jingwanrah ïaka Casino ha Ri-Bhoi, u la ong ba ka Casino ka dei kaba ki paidbah kila pyrshah lypa, hynrei ka jingdawa ka long ba ka sorkar ka dei ban weng noh syndon ïaka aiñ khalai haka jylla kaba ktah ïaki khun samla bad ki paidbah ka jylla baroh kawei.
U la ong ruh kumba la sakhi ruh dang ha kine ki khyndiat sngi haka dorbar Synrai la paw shai ba ka sorkar kala dep ban ai license sha kumba 3 ngut ki briew kiba kwah ban buh ïaka Casino bad katkum ka jingtip kiba bun ki dei beit ha Ri-Bhoi District bad kane ka jing ai license ïa kine ki Casino ka dei hadien bala wanrah ïa kata ka aiñ bala tip kum ka Meghalaya Regulation of Gaming Act 2021.
Lyngba katei ka aiñ ka kren shai ruh ban wanrah ïaki jaka ban dei ki ktem khalai (Physical Location) bad katei ka aiñ kan ai license sha kita ki briew, nangta kata ka Online Gambling ka ban long kum ka jinglehkai game ki khynnah ba kito kiba kwah lehkai khalai ki lah ban lehkai lyngba ki mobile bad ki kor internet bad kaba lai kadei kata ka online betting ne ka jingthong pisa haki jinglehkai bapher bapher lyngba ka internet, la ong u Bah George.
U Bah George B Lyngdoh u la kren shai ruh ba ka jingpyrshah kam dei tang ïaka Casino hynrei dei ban weng noh syndon mardor ïa ka aiñ (Meghalaya Regulation of Gaming Act 2021) baroh kawei bad ka jingkyntu ba dei ban peit lem ïaki kyndon aiñ ban ailad ïaki Online Gambling bad Online Betting namar ka mobile ka long haka bor bad ka kti ha man la ki kti jong ki khun samla ha kane ka juk ba mynta bad kane kan nang pynkyrni shuh shuh ïaki khun samla kiba lah ban lehkai naka ki jong ki iing ki sem, ki jaka pule bad ki jaka bapher bapher ba ki don bad kane ka jingpynshlur ïa kane ka kam khalai kan long shisha ka jingktah ïaki khun samla bad ki paidbah haka jylla baroh kawei.
Ha kawei pat ka bynta naka liang u Bah George B Lyngdoh u la kren shai ha kaba ïadei bad ka thong jong ka sorkar ban pynmih pisa lane khajna, ha u snem 2019-20 kumba 1200 klur ka pisa kaba ka sorkar kala pynlait ei naka daw ka jingbym lah ban lum khajna haka rukom kaba dei te lada ka sorkar shilliang ka pynlait ïaka khajna bad shilliang pat ban ong ban pynbiang da ka Casino ban lum khajna tang ïa kaba don ha kti ruh ym pat lah ban pynlait kumno yn pynlait ïa kaba thymmai?
Namarkata u la kyrpad sha ka sorkar jylla ba kane ka aiñ khalai ka dei kaba ktah ïaka ki khun samla bad ki paidbah ka jylla bad ka sorkar ka dei ban weng noh mardor ïa katei ka aiñ, u la bynrap.