Ki nongïalam ba shet kylla dei ki ingkhong shyllangmat, pynskhem u Bah Sadon ïaka HNYF Ri-Bhoi

Nongpoh, 14 Nailur: U Bah Sadon K Blah President ba rangbah ka Hynñiewtrep National Youth Front (HNYF) sengkmie mynta ka sngi u la leit ban pynskhem ïaki nongïalam ba pura jong ka HNYF Northern Region naka bynta ka samoi treikam jong u snem 2024-27 ban dang bteng ban ai ka jingshakri sha ki paidbah ka them Ri-Bhoi.
Ha katei ka sngi ba la pynskhem ïa kitei ki nongkitkam ba thymmai ka HNYF Northern Region, la sakhi da ka jingdon u Bah Mayral Born Syiem, MLA ka Nongpoh kum u kongsan, u Bah Cornelius Laloo, uwei naki nongthohkhubor na Ri Bhoi kum u symbud kongsan, ha ka jingdonlang ki riew rangbah
naduh u Bah Rocky Kylla, Chairman ka Umsning Town Durbar, ki Rangbah Shnong, ki riew rangbah ka thain Umsning lem bad ki dkhot ka HNYF sengkmie.
Ki nongialam ba thymmai ka HNYF Northern kiba la shah pynskhem thymmai ha katei ka sngi, ki kynthup ïa u Bah Headsting Lyngdoh kum u President, u Bah Alfred Malai kum u General Secretary, u Bah Edelbert Nongrum kum u Vice-President lem bad kiwei, kiba la bat ia ki kyrdan bapher bapher bad naka liang u Bah Sadon Blah haka jingpynskhem u la kren shai ba kum ki dkhot kiba la shim ïaka jingbam smai kim dei ban leh kino kino ki kam ki ban pynjah burom ïaka seng ne ban shet kylla ïaka seng namar lada ki leh kumta ki dei ki ingkhong shyllangmat.
Naka liang u Bah Sadon K Blah u la pynshai ruh halor ka nongrim jong ka seng ba ha kine ki 28 snem ka jingïaid lynti ngi dei ban sngewthuh shai ba ka jaitbynriew hynñiewtrep kam dei ka jaitbynriew kaba shah teh mraw naduh ka por ka jingsynshar ki syiem Muslim ha ri India bad kam dei ka jaitbynriew kaba long nong India naduh kato ka por namar hadien ka jingsynshar ki dohlieh bad ieh ïaka ri India, ki khlieh nongsynshar shnong kila soi da ka Instrument of Accession, hynrei ka sorkar India kala shu hiar thma bad pynap da ki ktang suloi ban pynlong nong India jubor ryngkat ka byrngem byrsit bad haduh mynta ka seng ka dang ieng haka Nongrim ba dei ban khyllie biang ïaka dulir bala dep soi bad lada dei ban ïasoh bad ka ri India ruh dei ban pynïasoh da ka jingsngewthuh jingmut ym ban shu pynbor.
U Bah Mayral Born Syiem kum u kongsan u la pynpaw ka jingsngewkmen kaba khraw ban don bynta lang haka jingpynskhem pura ïaki nongkitkam ka HNYF Northern Region, namar ki kynhun sngewbhalang ki long kum ki nongkyrsiew thiah ïaka sorkar ha kaba ïadei bad shibun ki mat ki jura bad ki jingeh jong ka ri bad ka jaitbynriew.
U la kyntu ruh ïaki nongïalam ba thymmai jong ka seng ba ki dei ban treibha ban ai ka jingshakri ba paka ïaka ri bad ka jaitbynriew ban myntoi bad suk ka pateng ban wan.