Kawei na ki daw bah ba ki nongkyndong jongngi ki sah dien sah ka long namar ba ki MLA lane kita ki nongmihkhmat shisien ba ki la jop ki poi sah syndon noh sha sor. Ym tang katta. Kiba bun ki dei hi ki nongsor kiba leit tyrwa ïalade ban long nongmihkhmat namar ki sngew ba ki paidbah ki donkam ïa ki. Don lei lei kiba sngew kynmaw shnong bad kiba kam ba ki dei na kata kata ka shnong tang ynda la kwah ban ïaleh elekshon. Shuwa ïa kata ki long babu-sahep ha Shillong kiba im ka jingim kaba suk ba saiñ bad ki bym sngewthuh satia ïa ka eh ka shon bad ka jingduk, jingduna jong ki briew kiba im ba sah jngai na sor Shillong, lane na Jowai, Nongstoing, Nongpoh, Sohra bad kumta ter ter.
Haba nga ïaid lynti sha South West Khasi Hills palat ïa ka Mawkyrwat kaba long kum ka nongbah jong ka distrik, bad ïaid kum sha Wahkaji, ne Domiasiat bad kumta ter ter, sngew shisha kum ban kheiñ noh ka syngkai namar ba la jur ka khohruh khohram. Ym don surok kaba ikop ïaid kali. Haba kumne lada don ki longkmie kiba dei ban kha khunlung sha ki hospital bah namar ba ym don lad ban pynkha ha ka PHC ïa kiba kha shitom bad kiba donkam ban shu puid, kumno keiñ kin lah ban poi sha ka jaka sumarï Hato kita ki MLA kiba shah jied bun bun sien ki ju pyrkhat mo ïa kaneï
Maki ïalade bad ki bahaïing hasem jong ki te ki biang keiñ namar kim sah shuh sha ki nongkyndong namar ba ki dang sah dien. Nadong shadong, naduh ki skul, haduh ki jaka ai jingsumar bun sa tang ki jingduna suda wat la ka jylla ka lah dap 50 snem. Ha ka jaka ban ïaid shaphrang ka jylla Meghalaya ka la nang hiar pynban ha kiba bun ki liang. Dei na ka daw ba ki MLA ki shu wan tang ban jngoh kai shisien lanor ïa ki shnong heh bad shnong rit ha ka konstituwensi jong ki bad kim juh sah miet hi ruh namar ba ka suk ka saiñ eh ha ka ïing paki dulan ha sor Shillong.
Haba nga kylli ïa ki longkmie bad ki samla la ki ju leit ne em ban shim dawai na ka PHC ka jubab jong ki ka long kaba sngewlyngngoh ban sngap. Ki ong, Ngim juh ïoh dawai ei wat la ngi long kiba duk, bad barabor hap ban thied dawai nabar te kan myntoi aiu ban leit shim dawai na PHCï Ka bha ban leit beit na ki doctor private.” Ka jingkylli mynta ka long shaei lut ki dawai kiba ka Health Department (Tnad Jingkoit Jingkhiah) jong ka sorkar ka pynlut da ki phew klur man la ka snem ban thied dawai, hana ban sam sha ki paidbah. Te shaei kita ki dawaiï Balei ki MLA kim tuklar satia ïa kine kiei kieiï Dei namar ka daw ba ki PHC bad CHC kim trei kam bha ba ki paidbah nongkyndong ki hap wan phah sumar ha sor, bad bunsien ha ki hospital rem dor kiba pynïaid da ki riew shimet (private hospital). Ynda lah dei ka por ba ki dei ban mih noh na hospital, ym dap pisa ban siew te hap leit pan na u MLA. Uta u MLA ruh ha ka jaka ba un duriap bad buddien balei ba ki hospital sorkar bad ki PHC, CHC kim trei kam ki sngewsuk ban shu siew pisa sha ki nongbud jong ki. Kita kiba ïoh pisa pat ki kylla long mraw shi junom bad hap jied ïa uta ujuh shi ujuh u briew kum u nongmihkhmat (MLA) wat lada um trei eiei na ka bynta ka konstituwensi bad ka jylla hi ruh baroh kawei.
Ngi don bun ngut kum kita ki MLA ki bym larkam eiei bad ki bym ju kren hi ruh ha ka ïing dorbar thaw-aiñ (Assembly). Kim juh buh ïa ki jingkylli halor ki phang kiba ktah ïa ki paidbah khamtam eh ha ka pule puthi, ka koit ka khiah, ka um bam um dih bad ki lynti ki surok. Ki sngap man-man bad bun kiba ïohthiah ruh ha ïing dorbar thaw-aiñ.
Kum ban shu kdew nuksa, ka shnong Maweit ha West Khasi Hills ka jngai tang kumba 35 km na ka Nongstoin kaba long ka nongbah jong ka distrik (HQ) hynrei shim por haduh 3 kynta ban poi. Dang mynta, hadien 50 snem, ngi ïohsngew ba yn shna bha ïa ka surok Maweit, hynrei haduh mynta ruh ym pat sdang shna. Bun kum kine ki surok ïa kiba ki MLA kiba mihkhmat ïa ki paidbah shato ki lah klet noh, namar ba suk ka leit ka wan lajong ha Shillong lane ha Nongstoin. Ki MLA imat namar ba bun ki dei ki rangbah kim sngewthuh satia ïa ka eh ka shon ki paidbah rangli juki.
Dei na kane ka daw ba lah dei ban jied noh da u/ka MLA kiba shong ba sah hapoh ka konstituwensi bad kiba lah ban sngewthuh lem ïa ka eh ka shon ki paidbah. Ynnai ban jied ïa ki babu-sahep teh tai bad phong sut kiba shu wan jngoh kai shisien lanor eh ïa ki nongjied jong ki bad kata ka long khamtam eh ynda la jan ka por elekshon.
Haduh katno keiñ mangi ki paidbah nongjied ngin shu shah pynthame ha ki jingkular ki bym shongniaï Bad ynda la jan ka elekshon bad kita ki MLA ki wan biang ban pan ïa ka jingkyrshan jong ki na ngi, hato ngi kloi mo ban pan jingkheiñ na ki kumno ki la shakri ïa ka konstituwensi. Hato ki la pynbha mo ïa ki lynti ïaid kaliï Hato ki la peit pyrman ne em ba ki jaka sumar nongpang kin long kiba khuid ba suba bad kiba don ki doctor man ka sngiï Hato ki paidbah ki ïoh ne em ïa ki dawaiï Hato ki PHC ki don ne em ïa ka mashin X-ray bad kiwei kiwei ki jingdonkam khnang ba yn lah ban tip thikna ïa ka jingpang bad ban ai dawai katkum ka jingpangï
Ki MLA hato ki ju leit jngoh lem ïa ki skul ban peit la ki nonghikai ki wan tista ne em; la ki jingdonkam ha skul kum ki jaka leit shabar ki biang ne em bad kumta ter ter. Kine baroh ki dei ki kam jong ki MLA, ym ban shu leh VIP bad ban shu leit da ka kali kat shaba don khnang ban lait ka ïakynduh briew. Ka kam MLA kam dei kaba suk lada trei hok ïa ka. Hynrei mynta ka pynkylla khongpong ïa kane ka kam. U ne ka briew ki kwah ïaleh elekshon tang ban ïoh bat ïa ka bor; ban ïoh thaw ïing paki dulan ha Shillong bad ban kyntiew ïalade bad ïa ka ïing ka sem lajong. Dei na kane keiñ ka daw ba ka Meghalaya ka la hiar ha baroh ki liang. Ka pop ka dei ka jongngi ki paidbah nongjied. Ngi long kiba pyrkhat tang ïa ka mynta bad ngi kloi ban kner ïa ka kti sha ka pisa ïoh-ei. Te haba kumta ngi shong hok keiñ ban ïa duk ïa sah dien sah.
