Ki la rah ïa ka burom ka Meghalaya bad ka Ri baroh kawei, ai khublei u Myntri Sport

Yn pynkup burom ka sorkar jylla ïa ki nongïakhun kti ba khur takma ha Turkey

0

Shillong, Risaw 21 : U Bah Bantridor Lyngdoh Myntri ba dei peit ïa ki kam ïalehkai jong ka jylla u la pynpaw ka jingsngewkmen bad ai khublei ïa ki nongïalehkai ïakhun kti ka jylla kiba la khur takma ha ka World Arm Wrestling Championship kaba long ha Turkey.
U Bah Banteidor Lyngdoh u la ong ba ka jingjop takma jong ki ka la rah ïa ka burom jong ka Meghalaya bad ka ri India hi baroh kawei. U la ong ruh ba ka sorkar jylla kan sa pynkup burom kyrpang ïa ki ynda ki la wanphai sha la ka jong ka jylla.
“Kaba kham sngewtynnad shuh shuh ka long ba u Bah Alexander Lyngdoh na Jaiñtia Hills watla u dei uba bym nang kren bad bym ïoh sngew ki shkor pynban u la ïoh khur takma rnong na ka “Standing Men 80kg Hearing Impaired’”. ong u Myntri.
Ka kynhun ki rang bad thei ïakhun kti ne Arm Wrestling ka Jylla Meghalaya kiba mih khmat ïa ka Ri India sha ka 43rd World Arm Wrestling Championship ki la ïoh ban khur takma na katei ka lympung kaba long ha Turkey.
Kiba la ïoh khur takma ki long ka Kong Margaret Pathaw na Umsning kaba la ïoh khur ïa ka takma ksiar bad ka Kong Angel Merry Mylliem Umlong kaba la ïoh khur takma rnong na ka ‘Master Women 60kg Left Hand’ Category.
Ki don baroh 9 ngut ki nongïa shim bynta kiba dei na ka Jylla ba kynthup ïa u Bah Alan S Marbaniang, Kishore Chettri, Everson Thangkhiew, Angel Merry Mylliem Umlong, Airikymenlang Lyngdoh, Margaret Pathaw, Alexander Lyngdoh, Hubert Paliar bad u Bah Banshan Terang.
Ïa kane ka jingleit ïa shim bynta jong ki la bei tyngka ruh da ka tnad sports ka Sorkar Jylla ha ka jingkhmih u Bah Banteidor Lyngdoh kum u Myntri uba la pynpaw ka jingsngew sarong bad ai khublei ïa ki rang bad thei ïakhun kti.
U la ong ba ka jingkhur takma ki rang bad thei ïakhun ka kti kiba dei na ka Jylla na ka bynta ka Ri India hi ka dei ka burom kaba khraw bad ka Sorkar kan sa pynkup burom ïa ki ynda ki la wanphai .

Leave A Reply

Your email address will not be published.