Jowai, Risaw 21 : Ka lympung ïalehkai jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha Kiang Nangbah Stadium, Dongmihsngi Jowai.
Ïa kane ka lympung la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar jong ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun na ka liang ka kynhun ïalehkai jong ka Sailung Ialong SC kala lah ban pynliem da 4-1 kol ïa ka Luti Tuber Ialong, ïa kitei ki kol na ka Sailung Ialong SC la thep da u Banshan Pale ha ka minit ba 1, u Casper Lhuid minit ba 18, u Dauruhi Pale minit ba 44 bad u Mewanpynshai Dhar ha ka minit ba 78.
Katba ïa ka shikol na ka Luti tuber Ialong SC la thep da u nongïalehkai jong ka u Richard Dhar 31 min, haduh ba kut jong ka jingïalehkai kala neh da 4-1 kol.
Ka jingïakhun lashai ka sngi 22 tarik kan long hadpeng ka Moosalyngkat SC pyrshah ïa ka Mukhla Evergreen SC ha ka por 2 baje shiteng nohphai sngi.
