Ki khynnah skul ki dei ban don ïa ka jingthrang ha ka jingim: Staising Kharbteng

0

Wahkaji, Ïaïong, 25: Kum shibynta ban pynpalei ïa ka jingmut jingpyrkhat ki khynnah skul bad ruh ban wanrah ïa ka jingieit ïa ki kam kilanmet hapdeng ki khynnah skul, ka shatri ki nonghikai na ki lai tylli ki skul ka shnong Wahkaji, South West Khasi Hills District ba kynthup ïa ka Wahkaji Government L.P. School, ka Langrin Government U.P. School, Wahkaji bad Wahkaji Secondary School ki la pynlong ïa ka Annual Sport Meet Wahkaji School 2023 ha ki ar sngi lynter.
Ha ka sngi kut la wan ban pynhap pyrda da u bah Staising Kharbteng, Sub Inspector of Schools kum u kongsan ha ka jingdon ryngkat ki nonghikai, ki khynnah skul bad ki kmie ki kpa.
U bah Staising Kharbteng kum u Kongsan haba kren ha ka jingïalang u la pynkynmaw ïa ki khynnah skul ba ki kam ïalehkai ki long u maw nongrim ban don ka mynsiem ïatreilang kawei kum ka kynhun bad kane kan ïarap ban saiñdur ïa ka mynsiem ïatreilang ha ka imlang sahlang ruh kumjuh, ka ïarap ïa ki khynnah skul ban pynpaw pyrthei ïa ka sap nongïalam ba ki don, ka jinglong ryntih ne discipline ha ki liang bapher bapher.
U kyntu kynpham ïa ki khynnah skul ban ñiewkor ïa ka por da kaba bate ban pyndep ïa ki kam bapher bapher ha ki jingpule, ki kam ïalehkai, ban ïarap ïa ki kam ha ïing ha sem bad kiwei kiwei ki bynta. Ha kajuh ka por u la ai jingmut ïa ki khynnah skul ba ki dei ban don ka thong ha ka jingim jong ki khnang ba kin nang ban pynkhreh kumno ban poi sha ka jingjop ha ka jingim jong ki bad ruh ban kiar na ki jingduna kiba lah ban ktah ïa ka jingpule jong ki. Kumjuh ruh u ong ba ki khynnah skul kum ki nongpule ki don ha ka lyngkha ban lur ïa ka lawei ba phyrnai jong ki bad kumta ki donkam ban minot ha ki jingpule.
La pynïaid ïa ka jingïalang da ka kong Joplincy Lyngdoh kaba long ka In-charge Headmistress ka Langrin Government Upper Primary School, Wahkaji bad ka jingkren ai khublei da u babu Wandajop Khalyngdoh.
Ïa ka nam Senior Boy Best Athlete la ïoh da u Walkingstar Marthong, Senior Girl Best Athlete la ïoh da ka Mira Lyngkhoi, Junior Boy Best Athlete la ïoh da u Pynshaibor Lyngkhoi, ïa ka Junior Girl best Athlete la ïoh da ka Teilarympei Langrin.
Ïa ka March Pass la jop da ka Yellow House bad ka Blue House ka la ïoh ïa ka nam kum ka lahduh ha kane ka lympung ïalehkai. Shuh shuh la ïoh ruh ban sam ïa ki khusnam sha ki nongjop bapher bapher da u kongsan ha ryngkat ki Nonghikai.

Leave A Reply

Your email address will not be published.