Ki kali tourist na shabar jylla ba wan kamai sha Meghalaya ki dei ban ïoh TL na KHADC: KHNAM

Shillong, Nailur 09 : Ka Khun Hynñiewtrep National Awakening Movement (KHNAM) ha ka sngi Nyngkong ka la kyntu ïa ka KHADC ba kadei ban tuklar khnang ba ki kali kali kamai na shabar jylla kiba wan ïalam ïa ki nongjngokai pyrthei sha Meghalaya ba ki dei ban da ïoh ïa ka Trading Licence.
Ïa kane ka KHNAM ka la pynpaw ha khmat u Executive Member ka tnad Trade, Bah Gigur Myrthong da kaba kdew halor ka nongrim ba ka aiñ Trading by Non-Tribal Regulation, 1954 kadei ban ïada ïa ka bit ka biang jong ki trai ri trai muluk.
Haba kren bad ki lad pathai khubor, u Working President ka KHNAM, Bah Thomas Passah u la ong ba ka Council ka dei ban pyntikna ba kin don kyndon na bynta kito ki kali kamai na shabar jylla kiba rung ban kamai sha ka jylla.
Ha kajuh ka por u la ïathuh pat ba na ka liang u EM u khlem ai kano kano ka jingkular tangba u shu ong ba u hap ban ïa syllok shwa bad ki ophisar halor kane ka bynta kaba la kdew da ka KHNAM.
U Bah Thomas u ong ruh ba ki kyrshan ïa ka synjuk ki kali kamai tourist kiba dawa ba ka hok ban ïalam ïa ki nongjngohkai pyrthei kylleng ki jaka dei ban ïoh da ki kali kamai na ka jylla.
Utei u nongïalam ka KHNAM u ong ruh ba ha u snem 2017 ki la pynlong ka jingwad bniah kumno ban pyntreikam da ka buit treikam jong ka Sikkim kaba ka sorkar ha katei ka jylla ka la don da ka polisi ba tang ki kali kamai na ka jylla kiba lah ban leit buh ïa ki nongjngohkai pyrthei kylleng ki jaka.
La ïathuh ruh ba ïa kane ka jingai jingmut ki la dep phah sha ka sorkar ha kito ki snem ban pyrthuh lang ïa ka buit treikam jong ka Sikkim hynrei kam shym la poi shano shano ruh.
Nalorkata, u la ong ruh ba na ka liang u Commissioner ka tnad Transport ha u Rymphang 2018 u la pynmih ka jingbthah ïa ki District Transport Officer (DTO) ba ki dei ban talasi ïaki tourist taxi kiba wan na shabar jylla ban leit sha kylleng ki jaka jngohkai pyrthei.
Tangba u ong pat ba na ka daw ka jingwan noh ka elekshon kane ka kam ka la shu kut noh kumto.