Ym lah ban len ha kine ki sngi bun bah na ki samla pule ha ka jylla ki hap ban mad ïa ki jingjynjar jong ka jingkyrduh kam kyrduh jam bad bun ruh na ki samla kiba la pyndep ïa ki kyrdan bapher bapher ha ki laiñ pule bapher bapher ki hap ban shong khlem kam khlem jam.
Ka jingkylli ka mih hangne, hato? ka sorkar jylla ka lah mo ban aikam aijam ïa baroh ki samla kiba la pyndep ïa ki kyrdan pule kiba kham shalor. Lah ban ong ka long kaba eh ba ka sorkar kan lah ban ai kam ai jam namar ba ka jingroi jong ka jingbun paid kiba la nang la stad ka la dangkiew katba dangmih ki sngi bad ki por.
Ynnai ïa kren lei lei ïa ka lawei jong ki khynnah pule kiba dang don ha ki skul ha kaba peit shisien peit la iduh jingkyrmen, namar khamtam kum ha ka Nongbah Shillong bad wat ha ki jaka nongkyndong ruh ha kine ki sngi tang kawei ka skul pule ka la don da ki hajar ngut ki khynnah pule.
Ban ïa kren lei lei ïa ki samla kiba la pyndep tang ïa ka degree level ruh da ki phew hajar ngut ki dang don kiba shong khlem kam khlem jam ha kaba ka sorkar kam lah satia ban ai kam ai jam. Lah ruh ban ong ba ka long shisha kaba shem jingeh ba baroh ki samla pule kin ïoh ïa ki kam sorkar kiba ha kine ki sngi tang ïa kawei ne ar tylli ki post ki nongthepkam ki la kot da ki hajar ngut.
Ka long pat kaba sngewsih ban ïoh sngew ne tip ba ka jylla jongngi ka dang duna ïa shibun ki samla kiba la pyndep ha kiwei pat ki kyrdan ha kaba dang don ki kam ba ki briew na ka jylla kim pat lah ban trei ha kaba la hap ban wan na ki briew kiba shabar ka jylla kaba buh ïa ka jingduh jingkyrmen ïa ki khun samla ka jylla.
Lah ruh ban ong ba wat lada ka sorkar kam lah ban ai kam aijam ïa baroh ki samla kiba la pyndep ïa ki kyrdan kiba kham shaneng, hynrei ka sorkar ka donkam hi ban shim khia na ka bynta ban thaw ïa ki polisi bapher bapher kaba long shi bynta kum ka jingplie lad plie lynti ïa ki khun samla ha ka ïoh kam ïoh jam da kaba seng nongrim ïa ki kam bad ïeng ha la ki kjat da ka jingïarap jong ka sorkar da ki skhim bapher bapher.
Ryngkat ki Polisi ban pynrungkam ïa ki khun samla la donkam ruh ba ka sorkar kan thaw ruh ïa ki lad jingïarap na ka bynta ki khun samla da kaba ïarap lyngba ki skhim sorkar bapher bapher, khang ba na ka bynta kito ki samla kiba ym donkam donjam ka long ka lad ka kabu ïa ki ba kin lah ban ïeng ha la ki jong ki kjat.
Lada phai ruh ha kine ki sngi lah ban kubur ruh ba ka long shisha ki sngi ba la kyrduh ïa ki kam ki jam, hynrei ym lah pat ban len ba dang bun ki kam ki jam ba la hap ban wan trei da ki bar jylla. Kum ka nuksa tang ïa ka kam misteri haba pyntrei ïa kino kino ki kam kiba la kham heh la hap ban wan rah ïa ki briew kiiba nabar namar shem jingeh ïa ki samla kiba la tbit ban trei wat kum ha kitei ki jaid kam ruh.Nalor kata ym lah ruh ban len ba ka kam kaba kiwei ki jaidbynriew ki trei tang shisngi da trei ki jong ngi ka shim por haduh ar bad lai sngi ym tip ba kim pat tbit ki sa suki ne ba ki suki hi ki kti ki kjat ruh.
Bun ruh na ki samla ki dang lehraiñ ruh ban trei ïa ki kam kiba kham poh namar ba ki don ka jingsngew ba ka kyrdan kaba ki pule kam ïahap shuh ïa ki kam barit baria. Hynrei bunsien pat ki samla kim juh phohsniew da kaba trei ïa ki kamrit kam ria ruh ka long kawei na ki lad ban aikam ïa ki samla ba kin lah ban ïeng hala ki jong ki kjat.
Ka jingkylli ka mih ruh hangne, balei ba ka jylla jongngi ka jyllei da ki mynder ha baroh ki bynta jong ka nongbah Shillong ne wat sha ki jaka nongkongdong, ka daw kaba kongsan ba bunsien ngi ki kum ki samla ngi don ka jinglehraiñ ban trei ia ki kam rit kam ria. Bunsien pat lada jyllei ki bar jylla ngi ïa ud bad ngi ïa kynshi ba ka sorkar kam shim khia ban ïada ïa ki mynder.
Khatduh eh, kum ki samla kiba la shai bad kiba la nang la stad ngi dei ban don ïa ki buit ym tang ban shu ïa pyrta ba ym donkam donjam, hynrei ngim dei ban shlur ban trei la ha kino kino ki kam baheh ne barit. Dei tang lada ki samla ki don ïa ka mynsiem ban trei bad ban tip lut ïa baroh ki jaid kam lah ban kyntiew ïa ki khun samla ha ka ïoh kam ïoh jam ne ka long ruh ka lad ba ngin khanglad ïa ki mynder kiba thmu ban wan rung sha ka jylla lada kum ki samla ki tip lut ïa baroh ki jait kam.
