Pynskhem ka Elaka Nongpoh sirdarship ïa u Bah Linus Lyngdoh kum u Lyngdoh pura ka Raid Nongpoh
Nongpoh, Nohprah 10: Kumba ju long katkum ka riti ka dustur na ban peit ban khmih ïa ka Raid Nongpoh ha ka liang ka synshar ka khadar ïa ki khun ki hajar, ka Elaka Nongpoh Sirdarship ha ka sngi Saitjaiñ ka la shim ïa ka bynta ban ai ka jingpynskhem ïa u Bah Linus Lyngdoh kum uta u Lyngdoh ba pura ka Raid Nongpoh ba hap hapoh ka Elaka Nongpoh Sirdarship ha Ri Bhoi District.
Ïa u Bah Linus Lyngdoh la wan ban pynskhem da u Acting Sirdar ka Elaka Nongpoh Sirdarship, u Bah Pillarstone Syiem Nongshai ban pynkup ïa kata ka spong ka phali bad ryngkat ka jingaiti ïa ka Sanat ba la ithuh noh ïa u kum uta u Lyngdoh ba pura ka Raid Nongpoh.
Ïa kane ka jingpynspong ne ka jingaiti ïa ka sanat la pynlong ha phyllaw ka ïing Dorbar Sajer, Nongpoh ha ka jingïalang kaba la long ha ka sngi Saitjain, ha kaba nalor ka jingdon u Acting Sirdar ka Elaka Nongpoh Sirdarship, u Bah Pillarstone Syiem Nongshai, kiwei kiwei kiba la ïa sakhi lang ki kynthup naduh u Bah P.N Syiem, Deputy CEM ka KHADC, u Bah Balajied Rani, MDC ka Nongpoh, ki longsan ki mansan ka Elaka Nongpoh Sirdarship bad kiwei kiwei ki riew rangbah jong ka Raid Nongpoh.
Dei ha kaba kum kane ka sngi, u Lyngdoh ka Raid Nongpoh, u la ioh ïa kata ka jingpynkup bor da ka Elaka Nongpoh Sirdarship ba ula long u Lyngdoh ba pura bad un sa shimti lut ïa baroh ki kam kiba dei na ka bynta ka synshar ka khadar ïa ki khun ki hajar kiba don hapoh kane ka Raid ba hap ha ka Elaka Nongpoh Sirdarship.
Ha katei ka sngi, la ioh ruh ka jingkren naduh kitei ki nongïalam ba kynthup naduh u Sirdar ka Elaka Nongpoh Sirdarship, u Bah Pillarstone Syiem Nongshai, u MDC ka Nongpoh, u Bah Balajied Rani, u Deputy CEM ka KHADC, u Bah P.N Syiem bad ka sur ba la mih na kitei ki nongïalam ka long ban ai mynsiem ïa une u Lyngdoh ba un shim ïa kata ka lyngkor jong ka jingkitkhlieh na ka bynta ban ai ka jingshakri kaba bha tam sha ki paidbah hapoh ka Raid Nongpoh.
Na ka liang u Lyngdoh ka Raid Nongpoh, u Bah Linus Lyngdoh ruh haba kren ha kane ka sngi u la pynpaw ïa ka mynsiem jong ka jingkmen bad u la kular ruh ban ai kata ka jingshakri kaba paka sha ki paidbah katkum ka riti ka dustur bad kumba la pynkup bor ïa u ban shim ïa kane ka lyngkor nongïalam ban long uta u Lyngdoh ha ka liang ka synshar ka khadar.