Shillong, Nohprah 10: Ka kynhun ïalehkai jong ka Shillong Lajong FC ka la mad ïa ka namrem kaba nyngkong ha ka lympung lehkai I-League mynta ka samoi bad kane ka la wan hakhmat ka kynhun ba khlaiñbor na Mizoram, ka Aizawl FC.
Ha kane ka jingïakhun ka Aizawl FC kaba ïalehkai shabar nala ïing ka la pynjemkhnap ïa ka Lajong haduh 3 kol khlem da shah thep ha kane ka jingïakhun ka jingïatyngkhuh ki klob ka thaiñ North East lane kata ka North-East derby kaba la pynlong ha SSA Stadium, Polo. Ka kynhun jong ka Aizawl ka la ïoh ban sdang ïa ka jingïalehkai da kaba seisoh ha kaba tang hadien 4 minit ba la ïaid ka por u Lalrinzuala Lalbiaknia u la ïoh ban thep ïa ka kol kaba nyngkong na bynta ka kynhun.
Hadien katei ka shi kol ka Aizawl ka la ïai bteng ban ñion ïa ka jingïakhun bad pynbud sa ïa ka kol kaba ar ha ka 17 minit lyngba ka kol kaba la thep da u R Ramdinthara.
Ka Aizawl ka la sngew skhem hadien ba la lamkhmat da ar kol bad ailad ïa ka Lajong ban tehlakam ïa ka bol hynrei kam shym la ailad ïa ka kynhun ba ïakhun hala ïing ban ïoh pynkhihjar. Haduh kaba kut jong ka kylla kaba nyngkong ka Lajong kam shym la lah satia ban pynphai kaba la pynlong ïa ka Aizawl ban lamkhmat da 2-0 kol ha ka kylla kaba nyngkong.
Ka Aizawl ka la nang pynkhlaiñ ïa ka rukom ïalehkai ha ka kylla kaba ar bad ha ka 57 minit u Joe Zoherliana u la ïoh ban thep sa ïa ka kol kaba lai kaba la nang pynskhem ïa ka kynhun ban khur shalade ïa ki lai point.
Na ka liang jong ka Lajong ka la pyrshang ban pynphai ïa kitei ki kol hynrei ka jingskhem jong ki bak ka kynhun liang pyshang ka la khanglad ïa ka kynhun ban ïoh thep wat tang shi kol kaba la bteng haduh kaba wai.
Lyngba kane ka namrem, ka Lajong ka la shah knieh kyrdan bad hiar sha ka kydan ba 4 ha ka miej da 16 point na ki 9 sien ïakhun. Katba ka Aizawl FC ka la kiew sha ka kyrdan ba ar da 17 point naki 9 sien ïakhun.
Ka Lajong kan pynkhreh ban ïalehkai shabar nala ïing pyrshah ïa ka Real Kashmir FC ha ka 16 tarik u Nohprah ha ka por 2 baje nohphaisngi, bad kane ka jingïalehkai yn pynlong ha TRC Turf Ground, Srinagar.
