Khliehriat, Nohprah 10: Ka lympung ïalehkai jong ka kyrdan Super Division Football Tournament 2023 kala jam mynta sha ka jingïakhun Semi Final kaba la long hynnin ka Sngi Saitjaiñ taïew ba lahdep ha madan Deinchynrum, EJHD bala pynïaid da ka East Jaiñtia Hills District Football Association (EJHDFA).
Haba phai sha ka jingïakhun jong ka Qualifier-1 kaba la long hapdeng ka Sutnga SSCC pyrshah ïa ka R.Shkenshynriah, naka liang ka kynhun ïalehkai jong ka Sutnga SSCC kala lah ban pynliem da 2-1 kol ïa ka R.Shkenshynriah SC. Ïa ki kol na ka Sutnga SSCC la thep da u Ioanis Suchen haka minit ba 53 bad u Ram Bareh haka minit ba 90+2. Na ka liang ka R. Shkenshynriah la thep da u Ribhame Dkhar ha ka minit ba 43.
Katba ha ka jingïakhun kaba ar jong ka Eliminator ka kynhun jong ka R.Iawpynsing SC kala lah ban pynliem da 2-1 kol ïa ka Khliehriat West YWSC, ïa ki kol na R.Iawpynsing SC la thep da u Phirip Lyngdoh haka minit ba 56 bad u Rimiki Rymbai haka minit ba 67. Na ka liang jong ka Khliehriat West la thep da u Raplangki Lyngdoh haka minit ba 82.
La pyntip ba ka jingïakhun Qualifier 2 kan long ha ka 12/12/2023 haka por 1 baje nohphai sngi hapdeng ka R.Skhenshynriah SC pyrshah ïa ka R.Iawpynsing SC. Katba ka jingïakhun Final kan long ha ka 15/12/2023.
