K a North Eastern Hill University watla ka dei ka skulbah kaba la pawnam bha ha kane ka ri India hynrei ki jingjia kiba la jia hapoh kane ka skulbah ka la pynrah skhor ïa kiba bun balang khamtam ïa ki kmie ki kpa kiba phah pule ïa la ki jong ki khun ki kti ha kane ka shlem pule jong ka Sorkar Pdeng kaba don ha Sor Shillong.
Ka jingthombor jong u Asst. Sports Director kane ka skulbah ïa ka longryngieng jong ka kawei ka Referee kynthei kaba la jia dang shen ka la pynhiar dor bha ïa kane ka skulbah. Kane kam dei shuh ka jingjia kaba tang shisien hynrei ki la don ki khep kiba ki samla pule kynthei ha kane ka skulbah ki la mad ïa ki jingshah thombor ha ka longrynieng. Ha kine ki 50 snem ba la seng ïa kane ka skulbah ha kane ka jylla Meghalaya ki jingshah thombor jong ki kynthei kiba paw pyrthei kim duna shuh da ki phew tylli. Sa ki bym paw pyrthei katno tylli shuh kin don namarba ki don ki lanot ki bym nud ban saham na kiba bun ki daw bad lehse ki sheptieng ne ki shah byrngem byrsit da kumne bad da kumtai.
Ka jingshah sloit lyngkhuid jong uwei u samla pule ha NEHU Tura Campus ka dei ka jingjia kaba la pynhiar dor shuh shuh ïa kane ka skulbah bad kane ka la nang pynktha khlieh ïa u Vice Chancellor ba mynta u Prof. PS Shukla uba dang shu wan shimti ban pynïaid ïa kane ka skulbah dang katto katne. Kine ki jingjia ki la pynking baiong wat ïa ki bor pynïaid bad ki nongpeit jong kane ka skulbah ha kaba kim ju phohsniew ba kum kine ki jingjia, kin wan jia hapoh ki saw kynroh jong kane ka skulbah kaba la pawnam hakhmat ka ri India.
Toi, watla ka jingtohkit jong ki bor Pulit ka Tura halor ka jingshah pynlaw lyngkhuid jong u samla pule ha Tura Campus ka dang ïaid shakhmat hynrei ki bor pynïaid jong ka skulbah NEHU kim dei ban shu shim sting ïa kane ka kam namarba ha u snem 2001, ka Ingbishar Supreme Court ka la khang ïa ka jingshah pynlehrain ne ka “Ragging,” bad ka University Grants Commission (UGC), ka All India Council for Technical Education (AICTE) bad ka Medical Council of India (MCI) ki la pynjari da ki kyndon kiba khang pyrshah ïano ïano ban thombor ne pynlehrain (Ragging) ïa kino kino ki samla pule ha ki skulbah.
Ka jingshah thombor jong kino kino ki samla pule ha ki para ba ki ïa pule lang ka pynduh mynsiem bad ka pyntroiñ noh ïa ka bor pyrkhat bad ka bor jabieng jong ki lanot bad ka jingshah ktah ha ka bor pyrkhat pyrdaiñ, ha ka bor met ka pynlong ïa ki lanot ba kin ym lah shuh ban dang ïaid shakhmat ban bteng ïa ka jingpule ka jong ki bad kane kan ktah haduh katta katta ruh ïa ka lawei pule ka jong ki.
Haba phai pat sha ki kam jrongkti jong ki nonghikai ne ki nongtrei hapoh ka skulbah NEHU, ki bor pynïaid kim dei satia ban shim sting ïa kine ki kam namarba kan long ka jinglehrain lada u Vice Chancellor um lah ban leh eiei pyrshah ïa u nongleh kam bymman.
Ka jingdawa jong ki samla pule bad ki nonghikai ka skulbah NEHU ban weng ïa ki kam ba la bynshet ha u Nantu Das uba la shah kynnoh ba u donkti ha ka kam thombor ïa ka Referee kynthei ka long kaba shongnia namarba ka aiñ jong ka ri, ka POCSO Act ruh ka ïada ïa ki kynthei na ki jingshah thombor ha ka longryngieng bad ka Protection of Women from Sexual Harassment Act, 2013 ka ïada ïa ki kynthei na ki jingshah thombor ha ki jaka trei.
Katkum ka jingpynpaw jong ki samla pule Research Scholars ka NEHU, ki sheptieng bha ban ïaid miet khamtam haba ki mih na ka jaka pule ynda la miet namarba u briew uba donkti ban thombor ïa ka longryngieng ka kynthei u dei uba peit ruh ïa ka Security hapoh kane ka skulbah. Mano ban shim ïa ka jingkitkhlieh lada u nongïada un kylla long pynban u nongthombor.
Ym tang katta, ka NEHUTA bad ka NEHUSU ha ka jingphah kyrwoh ki kam ba ki la ïoh ujor na ki samla pule ba u Asst. Sports Director ka NEHU u dei uba ju mlien ban jrongkti ïa ki samla pule kiba ju angnud ban pynpaw pyrthei ïalade ha ki kam ïalehkai sports.
Kumba ka NEHUTA, NEHUNSA bad ka NEHUSU ki la mih paidbah ban dawa khlem shongthait ïa u Vice Chancellor ka skulbah NEHU ban wengkam ïa u Rohit Prasad ïa uba la kynnoh ba la shu thungkam kontrak beain, ki dei ruh ban ïaid shakhmat ban dawa ïa u Vice Chancellor ban pynthikna ïa ka jingshngaiñ jong ki samla pule ym tang ha Shillong Campus hynrei wat ha ka Tura Campus.
