Shillong, Naiwieng 22: Ka Meghalaya Boxing Association (MBA) ka la pynbna ba ka ladep ban jied ïa khyndai ngut ki rangïakura ba kynsai ki ban mihkhmat ïa ka jylla ha ka 7th Elite Men’s National Boxing Championship, kaba la khreh ban sdang ha kane ka Sngi Saitjaiñ mynta ka taïew.
Ha kane ka kynti yn sakhi palat 350 ngut ki rangïakura ki ban ïashimbynta ha ki 13 tylli ki kyrdan bapher bapher (weight category) bad ka rynsan ïakura kan long ha SAI Indoor Stadium, NEHU ka ban sdang naduh ka 25 tarik Naiwieng haduh 1 tarik Nohprah.
ïa kane ka Championship la pynlong da ka MBA ha ryngkat ka jingïatreilang bad ka Boxing Federation of India (BFI) lem bad ka jingkyrshan na ka Department of Sports and Youth Affairs, jong ka sorkar jylla Meghalaya.
Kine ki rangïakura ki ban mihkhmat ïa ka Meghalaya ki kynthup ïa u Sanjeev Maskut (46-48kg), u Banjop Nongkhlaw (51-54kg), u Melvin Marbaniang (54-57kg), u Kordor Marwein (57-60kg), u Badonkupar Synnah (60-63.5kg), u Bhalang Shadap (63.5-67kg), u Balnas Sangma (67-71kg) bad u Justerwell Jyrwa (71-75kg). Katba ki Coach ki kynthup ïa u Bah Pynskhem L Nonglait, u Bah Wilfred Kharmawlong bad u Noyontho Marak.
Kine ki rangïakura kiba la shah jied ki dei kiba la seisoh ha ki rynsan ïakhun hapoh ka jylla bad mynta, kin sa ïatyngkhuh ban aireng pyrshah ïa ki rangïakura ba la khampaw kiba na kylleng ka ri India, kiba bun naki ki dei kiba la jop takma ha ka National Games, Asian Games bad ruh ha ka Commonwealth Games.
Kin don ruh katto katne ki rangïakura ba kynsai jong ka ri kiba la paw bad kine ki kynthup ïa u lahduh ba la jop ar sien ha ka Olympic bad hynriew sien ha ka Asian Championship- u Shiva Thapa, u lahduh ka Asian Games 2018 -u Amit Panghal bad u rangïakura ba la khur takma rnong ha ka Commonwealth Games 2022-u Rohit Tokas.
Nalor kane, na ka liang jong ka BFI ka la rai ban pynlong ïa ka jingkilanmet ha u bnai ban wan na bynta ban pynkhreh ïa ka Paris Olympics 2024, kane ka lympung ban sa long ha nongbah Shillong ka long kaba kongsan eh ïa ka ri ban jied ïa ki rangïakura.
Ka long ruh ka jingsngewsarong ïa ka MBA ban ïoh pynlong ïa kane ka lympung bad na ka liang jong ka synjuk ryngkat ka jingïatreilang bad ka Department of Sports and Youth Affairs ka sorkar jylla, ka la trei shitom na bynta ka jingynïaid bad ban ïoh ïa ka lympung kaba seisoh.
